கியூபெக்கின் அமெரிக்க மதுபானங்களுக் கியூபெக்கான தடை, தங்களுக்குக் கடுமையான பொருளாதாரப் பேரழிவு – கலிபோர்னியா அரசியல்வாதிகள் கவலை

அமெரிக்க அதிபர் டொனால்ட் ட்ரம்பின் வரி விதிப்புகளுக்குப் (Tariffs) பதிலடியாகக் கனடாவின் கியூபெக் (Quebec) மாகாணம் விதித்துள்ள அமெரிக்க மதுபானங்களுக்கான தடை, தங்களுக்குக் கடுமையான பொருளாதாரப் பேரழிவை ஏற்படுத்தியுள்ளதாக அமெரிக்காவின் கலிபோர்னியா மாகாண அரசியல்வாதிகள் மற்றும் கன்சர்வேடிவ் நாடாளுமன்ற உறுப்பினர்கள் பகிரங்கமாகக் கவலை வெளியிட்டுள்ளனர்.

அமெரிக்க அதிபர் டொனால்ட் ட்ரம்ப் கடந்த ஆண்டு கனேடியப் பொருட்களுக்கு விதித்த கடுமையான இறக்குமதி வரிகளுக்குப் பதிலடியாக, கியூபெக் மாகாணம் அமெரிக்க மதுபானங்களை முற்றாகப் புறக்கணிக்கும் (Boycott) அதிரடி நடவடிக்கையை எடுத்திருந்தது.

இத்தடையால் கலிபோர்னியாவின் திராட்சை மற்றும் ஒயின் உற்பத்தியாளர்கள் (Winegrowers) மிகக் கடுமையான நஷ்டத்தைச் சந்தித்து வருவதாக அமெரிக்க செனட்டர் ஆடம் ஷிஃப் (Adam Schiff) சமூக ஊடகங்கள் வாயிலாகப் பகிரங்கமாகக் குற்றம் சாட்டியுள்ளார். இருப்பினும், அமெரிக்கா தனது அநியாயமான வரிகளைத் திரும்பப் பெறாதவரை இந்தத் தடை நீங்கும் பேச்சுக்கே இடமில்லை என்று கியூபெக் மாகாண முதல்வர் கிறிஸ்டின் பிரேஷெட் (Christine Fréchette) மிகக் கடுமையான தொனியில் பதிலடி கொடுத்துள்ளார்.

அமெரிக்காவின் மதுபானங்கள் மீதான கியூபெக்கின் இந்த தடை உத்தரவானது, அமெரிக்க மாநிலங்களுள் ஒன்றான கலிபோர்னியாவின் பொருளாதாரத்தை கடுமையாகப் பாதித்துள்ளது. இதனால் கலிபோர்னியாவின் முன்னாள் சபாநாயகர் நான்சி பெலோசி (Nancy Pelosi) உள்ளிட்ட 14 மக்கள் பிரதிநிதிகள் அடங்கிய இருகட்சி கூட்டுக்குழுவும், அதனைத் தொடர்ந்து செனட்டர் ஆடம் ஷிஃப்பும் கியூபெக் முதல்வர் கிறிஸ்டின் பிரேஷெட்டிற்கு அவசரக் கடிதங்களை அனுப்பியுள்ளனர்.

அமெரிக்க அதிபர் டொனால்ட் ட்ரம்ப் முன்னெடுத்துள்ள இந்த வர்த்தகப் போரை (Tariff wars) கலிபோர்னியா மாகாணம் ஆதரிக்கவில்லை என்பதை கனேடிய அரசு புரிந்து கொள்ள வேண்டும் என, அவர்கள் தெரிவித்துள்ளனர்.

அமெரிக்க மதுபானங்கள் மீதான கியூபெக் அரசின் தடை காரணமாக, கியூபெக்கின் மதுபான நுகர்வோரும் கலிபோர்னிய மதுபான உற்பத்தியாளர்களுமே பாதிக்கப்படுவதாக, அக்கடிதங்கள் குறிப்பிட்டுள்ளன.

எனவே, கியூபெக் அரசானது அமெரிக்க மதுபானங்கள் மீதான தடையை உடனடியாக நீக்க வேண்டும் என வேண்டுகோள் விடுக்கப்பட்டுள்ளது.

கியூபெக் மதுபான நுகர்வோருக்கு அமெரிக்க ஒயின்கள் கிடைக்காததால், சுமார் 434 மில்லியன் டொலர் மதிப்புள்ள ஒரு மாபெரும் வர்த்தகச் சந்தை முடங்கியுள்ளதாகவும் அமெரிக்கத் தரப்பு சுட்டிக்காட்டியுள்ளது.

இதேவேளை, கலிபோனிய மாநிலப் பிரதிநிதிகளின் இந்தக் கோரிக்கையை கியூபெக் முதல்வர் கிறிஸ்டின் பிரேஷெட் முற்றாக நிராகரித்துள்ளார். தற்போது நடந்து வரும் வர்த்தகப் போரில், கியூபெக்கின் பொருளாதார நலன்களைப் பாதுகாப்பதில் தமது அரசு உறுதியாக உள்ளதாக, அவர் அறிவித்துள்ளமை குறிப்பிடத்தக்கது.