பல்கலைக்கழக மருத்துவமனை அந்தஸ்தை பெற்ற மொன்றியலின் ஜூவிஷ் ஜெனரல் மருத்துவமனை

கியூபெக் மாகாணத்திலுள்ள முன்னணி மருத்துவ நிறுவனங்களில் ஒன்றான மொன்றியலின் ஜூவிஷ் ஜெனரல் மருத்துவமனைக்கு (Jewish General Hospital) அதிகாரப்பூர்வமாகப் ”பல்கலைக்கழக மருத்துவமனை” (University Hospital Status) அந்தஸ்து வழங்கப்பட்டுள்ளது.

பிரெஞ்சு மொழியில் ‘சென்டர் ஹாஸ்பிடலியர் யுனிவர்சிட்டேர்’ (Centre hospitalier universitaire – CHU) என்று அழைக்கப்படும் இந்த உயரிய மருத்துவக் கல்விப் பிரிவு தகைமை, இந்த நிறுவனத்தின் வரலாற்றில் ஒரு புதிய அத்தியாயமாக மாறியுள்ளது.

கியூபெக் மாகாண சுகாதார அமைச்சர் சோனியா பெலாங்கர் (Sonia Bélanger) ஊடகவியலாளர் சந்திப்பின் போது இந்த உத்தியோகபூர்வ அறிவிப்பை வெளியிட்டார்.

கிட்டத்தட்ட ஒரு நூற்றாண்டு காலமாக மருத்துவத் துறையில் இந்த நிறுவனம் ஆற்றிவரும் அர்ப்பணிப்பு, மருத்துவக் கண்டுபிடிப்புகள் மற்றும் நோயாளர் நலச் சேவைகளுக்கான மிகச்சிறந்த அங்கீகாரமாக இந்த அந்தஸ்து உயர்வு அமைந்துள்ளதாக அவர் குறிப்பிட்டார்.

இதன் மூலம், மருத்துவப் படிப்பினை மேற்கொள்ளும் அடுத்த தலைமுறை மாணவர்களுக்கான பயிற்சித் தளமாகவும், அதிநவீன மருத்துவ ஆராய்ச்சிகளுக்கான பிரதான மையமாகவும் இந்த மருத்துவமனை அதிகாரப்பூர்வமாக உருவெடுத்துள்ளது.

கியூபெக் மாகாண அரசுக்கு நேரடி நிதிச் சுமை எதனையும் ஏற்படுத்தாத இந்த அந்தஸ்து மாற்றமானது, அந்த மருத்துவமனைக்கு முன்னெப்போதும் இல்லாத புதிய முதலீட்டுப் பாதைகளைத் திறந்துவிட்டுள்ளது.

”பல்கலைக்கழக மருத்துவமனை” என்ற இந்த அந்தஸ்தைப் பெற்றதன் மூலம், இதற்கு முன்னர் தகுதிபெறாத பல்வேறு உயர்மட்ட மருத்துவ ஆராய்ச்சி மற்றும் கற்பித்தல் நிதியுதவிகளை சர்வதேச அளவிலும் உள்நாட்டிலும் கோருவதற்கு இந்த மருத்துவமனைக்கு இனி தகுதி கிட்டும் என்று கூறப்படுகின்றது.