இந்தியாவில் வாக்காளர் பட்டியல் தீவிர திருத்த (SIR) நடவடிக்கை நிறைவடைந்துள்ள மாநிலங்களில், தவறாக நீக்கப்பட்ட தகுதியுள்ள வாக்காளர்களை மீண்டும் பட்டியலில் சேர்க்க உரிய நடவடிக்கை எடுக்குமாறு மாநில தேர்தல் ஆணையங்களுக்கு இந்திய தேர்தல் ஆணையம் உத்தரவிட்டுள்ளது.
இரண்டு கட்டங்களாக நடந்து முடிந்த இந்த நடவடிக்கையின் மூலம் தமிழ்நாடு உட்பட பல்வேறு மாநிலங்களில் லட்சக்கணக்கான வாக்காளர்களின் பெயர்கள் நீக்கப்பட்டன.
எதிர்க்கட்சிகளின் கூற்றுப்படி, 31 மாநிலங்கள் மற்றும் யூனியன் பிரதேசங்களைச் சேர்ந்த சுமார் 13.8 கோடி (14.6 சதவீதம்) வாக்காளர்களின் பெயர்கள் வாக்காளர் பட்டியலிலிருந்து நீக்கப்பட்டுள்ளதாக குற்றச்சாட்டுகள் எழுந்தன.
இக்குற்றச்சாட்டுகளுக்கு மத்தியில், ‘படிவம் 6’ மூலம் பட்டியலில் இருந்து தவறாக நீக்கப்பட்ட தகுதியுள்ள வாக்காளர்களை மீண்டும் சேர்க்க தேர்தல் ஆணையம் நடவடிக்கை எடுத்துள்ளது. இதன் படி, வாக்குச்சாவடி நிலை அதிகாரிகள் (BLO) தீவிர திருத்த நடவடிக்கைக்கு முந்தைய மற்றும் பிந்தைய வாக்காளர் பட்டியல்களை ஒப்பிட்டு, விடுபட்டவர்களைக் கண்டறிவார்கள்.
பின்னர் அதிகாரிகள் வீடு வீடாகச் சென்று அவர்களின் தற்போதைய நிலையைச் சரிபார்த்து, தகுதியுடையவர்களாக இருந்தால் ‘படிவம் 6’ மூலம் மீண்டும் பதிவு செய்ய உதவுவர். சுமார் ஒரு மாதத்தில் இந்த முழு செயல்முறையையும் முடிக்க திட்டமிடப்பட்டுள்ளதுடன், புதிதாகப் பதிவுசெய்த வாக்காளர்களின் பட்டியல் அரசியல் கட்சிகளின் வாக்குச்சாவடி நிலை முகவர்களுடன் பகிரப்படும் என்றும் தெரிவிக்கப்பட்டுள்ளது.
இறுதியாக, வாய்ப்பைத் தவறவிட்ட தகுதியுள்ள வாக்காளர்களுக்கு மற்றொரு வாய்ப்பை வழங்குவதற்காக சிறப்பு வாக்குச்சாவடி முகாம்களும் ஏற்பாடு செய்யப்படும் என தேர்தல் ஆணையம் விளக்கமளித்துள்ளது.
