நீண்டகாலமாக நிலுவையில் உள்ள ஆனைமலையாறு – நல்லாறு திட்டத்தைச் செயல்படுத்துவது தொடர்பாக, தமிழக அமைச்சர்கள் அடங்கிய குழுவொன்று எதிர்வரும் அக்டோபர் 5ஆம் திகதி கேரள முதலமைச்சரை நேரில் சந்தித்துப் பேச்சுவார்த்தை நடத்தவுள்ளது.
பரம்பிக்குளம் – ஆழியாறு பாசனத் திட்டத்தின் (PAP) முக்கிய அங்கமாகக் கருதப்படும் ஆனைமலையாறு – நல்லாறு திட்டத்தைச் செயல்படுத்த வேண்டும் என கோவை, திருப்பூர் மற்றும் ஈரோடு மாவட்ட விவசாயிகள் நீண்டகாலமாகக் கோரிக்கை விடுத்து வருகின்றனர்.
இத்திட்டம் நிறைவேற்றப்பட்டால், மேற்கு மாவட்டங்களிலுள்ள பல இலட்சம் ஏக்கர் விவசாய நிலங்கள் பாசன வசதி பெறுவதுடன், குடிநீர்ப் பிரச்சினைகளுக்கும் நிரந்தரத் தீர்வு கிடைக்கும் எனக் கருதப்படுகிறது.
இரு மாநில எல்லைப் பகுதியில் அமைந்துள்ள இந்த நீர் திட்டத்தை நிறைவேற்றுவதில் சில சிக்கல்கள் நிலவி வந்த நிலையில், இரு மாநில அதிகாரிகள் மட்டத்திலான முதற்கட்டப் பேச்சுவார்த்தைகள் ஏற்கனவே நடைபெற்று முடிந்துள்ளன.
இதனைத் தொடர்ந்து, திட்டப்பணிகளை விரைவுபடுத்தும் நோக்கில் தமிழக நீர்வளத்துறை அமைச்சர் உள்ளிட்ட அமைச்சர்கள் மற்றும் உயர் அதிகாரிகள் கொண்ட குழு, அக்டோபர் 5ஆம் திகதி திருவனந்தபுரத்தில் கேரள முதலமைச்சரைச் சந்தித்து முக்கிய ஆலோசனையில் ஈடுபடவுள்ளனர்.
இச்சந்திப்பின் போது திட்டத்தின் சாதகமான அம்சங்கள் மற்றும் இரு மாநிலங்களுக்கும் இடையிலான ஒப்பந்த நடைமுறைகள் குறித்து விரிவாக விவாதிக்கப்படும் என எதிர்பார்க்கப்படுகிறது.
