யாழ்ப்பாணம், கோப்பாய் சரவணபவானந்தா வித்தியாலயத்தின் நூற்றாண்டு விழா கொண்டாட்டத்தின் ஒரு பகுதியாக இன்றையதினம் ஞாயிற்றுக்கிழமை நடைபவனி இடம்பெற்றது.
பாடசாலை நுழைவாயிலில் இருந்து ஆரம்பித்த நடைபவனி கோப்பாய் பகுதி ஊடாக பருத்தித்துறை வீதியை அடைந்து மீண்டும் பாடசாலையை வந்தடைந்தது.
நடைபவனியில் கலை நிகழ்ச்சிகளுடன், கோப்பாய் கிறிஸ்தவக் கல்லூரி மாணவர்களின் இன்னியம் முழங்க, மாறு வேடத்தில் சிறுவர்கள் பங்கேற்றதுடன் போதைப் பொருள் பாவனைக்கு எதிரான பிரசாரங்களும் முன்னெடுக்கப்பட்டது.
இதேவேளை நடைபவனியின் போது கோப்பாய் சித்திர வேலாயுதர் கோவிலில் விசேட வழிபாடுகள் நடைபெற்றதுடன், சிறந்த அதிபர் மற்றும் ஆசிரியர்களுக்கு வழங்கப்படும் குரு பிரதீபா பிரபா விருதுக்கு தெரிவான பாடசாலை அதிபர் அமிர்தலிங்கம் கஜேந்திரன் பாடசாலை சமூகத்தினரால் கௌரவிக்கப்பட்டார்.
நூற்றாண்டு விழாவின் பிரதான நிகழ்வுகள் எதிர்வரும் 9ஆம் மற்றும்10 ஆம் திகதிகளில் பாடசாலையில் நடைபெறவுள்ளது.
இதன்போது பாடசாலையின் பிரதான நுழைவாயில் திறந்துவைக்கப்படவுள்ளதுடன், நூற்றாண்டு மலர் வெளியீடு, பரிசளிப்பு விழா, முத்திரை வெளியீடு, கௌரவிப்பு விழா என்பனவும் இடம்பெறவுள்ளமை குறிப்பிடத்தக்கது.
