ஈரானில் ‘ஸ்டார்லிங்க்’ (Starlink) செய்மதி இணையச் சேவையை எதிரிகளுக்கான போர்க்கருவியாகக் கருதுவதாகவும், தேசிய பாதுகாப்பு மற்றும் இணையக் கட்டுப்பாடுகளை மேலும் கடுமையாக்குவது குறித்து பரிசீலித்து வருவதாகவும் அந்நாட்டு அதிகாரிகள் எச்சரித்துள்ளனர்.
அமெரிக்கா மற்றும் இஸ்ரேலுடனான ஈரானின் நீண்டகால மோதல்களுக்கு மத்தியில், எலான் மஸ்க்கின் ஸ்பேஸ்எக்ஸ் (SpaceX) நிறுவனத்திற்குச் சொந்தமான ‘ஸ்டார்லிங்க்’ சேவையை முடக்குவதற்கான நடவடிக்கைகள் தீவிரப்படுத்தப்பட்டுள்ளதாக ஈரானிய அதிகாரிகள் தெரிவித்துள்ளனர்.
கடுமையான இணையக் கட்டுப்பாடுகள் மற்றும் அரசாங்கத் தணிக்கைகளைத் தாண்டிச் செயற்படும் இந்தச் சேவை, நாட்டின் தேசிய பாதுகாப்புக்கு அச்சுறுத்தலாக உள்ளதாகத் தெரிவிக்கப்பட்டுள்ளது.
இது குறித்து ஈரானின் உச்ச தேசிய இணையவெளி மன்றத்தின் (Supreme National Cyberspace Council) செயலாளர் மொஹம்மத் அமீன் அகமிரி தெரிவிக்கையில், “எதிரிகள் தங்களின் கட்டளை மற்றும் கட்டுப்பாட்டுக்காகவும், உளவு பார்த்தல் மற்றும் தகவல் சேகரிப்புக்காகவும் ஸ்டார்லிங்க் சேவையைப் போர் ஆயுதமாகப் பயன்படுத்துகின்றனர்” எனக் குறிப்பிட்டுள்ளார்.
மேலும், ஸ்டார்லிங்க் செய்மதி முனையங்களை (Starlink terminals) துண்டிப்பதற்கான பல அமைப்புகள் தங்களிடம் உள்ளதாகவும் அவர் கூறியுள்ளார்.
ஈரானில் ஸ்டார்லிங்க் சாதனங்களைப் பயன்படுத்துவதும் விநியோகிப்பதும் முற்றிலுமாகத் தடைசெய்யப்பட்டுள்ளதுடன், அத்தடையை மீறுபவர்களுக்கு அபராதம் மற்றும் சிறைத்தண்டனை விதிக்கப்படுகிறது.
அமெரிக்காவும் இஸ்ரேலும் கடந்த பெப்ரவரி 28ஆம் திகதி ஈரானைத் தாக்கியது முதல், அங்கு இணையச் சேவைகள் கடுமையான பாதிப்புகளைச் சந்தித்துள்ளமை குறிப்பிடத்தக்கது.
