தையிட்டி விகாரை அமைந்துள்ள பகுதியில் மேலும் சட்டவிரோதக் கட்டடங்கள் கட்டப்படுவதாகக் கிடைக்கப்பெற்ற முறைப்பாட்டின் பிரகாரம், அங்கு சென்ற வலி.வடக்கு பிரதேச சபை உறுப்பினர்களைப் பொலிஸார் தடுத்து நிறுத்தியுள்ளனர்.
வலி.வடக்கு பிரதேச சபையின் மாதாந்த அமர்வு தவிசாளர் சோ.சுகிர்தன் தலைமையில் பிரதேச சபை சபா மண்டபத்தில் நடைபெற்றது.
கூட்டத்தின் போது, தையிட்டி விகாரை அமைந்துள்ள பகுதியில் மேலும் சட்டவிரோதக் கட்டடங்கள் கட்டப்படுவது தொடர்பிலும், விகாரைக்கு அருகில் உள்ள பிரதேச சபைக்கு சொந்தமான பவானி வீதியினை விடுவிக்கும் நடவடிக்கைகள் தொடர்பிலும் பிரஸ்தாபிக்கப்பட்டது.
இதனைத் தொடர்ந்து கூட்டம் நிறைவுற்ற பின்னர், தவிசாளர் தலைமையில் பெரும்பான்மையான சபை உறுப்பினர்கள் விகாரை அமைந்துள்ள பகுதிக்கு விஜயம் செய்தனர்.
எனினும், விகாரையின் வாயிலில் காவல் கடமையில் இருந்த பொலிஸார், தவிசாளர் தலைமையில் சென்ற பிரதேச சபை உறுப்பினர்களை உள்ளே செல்ல அனுமதிக்கவில்லை.
இதன் காரணமாக, விகாரைக்கு வெளியே நின்ற பிரதேச சபையின் அனுமதிகள் இன்றி சட்டவிரோதமான முறையில் தனியார் காணிகளில் முன்னெடுக்கப்படும் புதிய கட்டுமானப் பணிகளைத் தவிசாளர் உள்ளிட்ட உறுப்பினர்கள் நேரில் பார்வையிட்டுச் சென்றனர்.
