யேமனின் ஷப்வா மாகாணத்தில் உள்ள அரசுப் பாதுகாப்புப் படை பயிற்சி முகாம் மீது ஈரான் ஆதரவு பெற்ற ஹூதி கிளர்ச்சியாளர்கள் நடத்திய தாக்குதலில் 53 பேர் கொல்லப்பட்டதாகவும், 200 பேர் காயமடைந்ததாகவும் உள்ளூர் நிர்வாகம் தெரிவித்துள்ளது.
ஷப்வா மாகாணத்தில் ஷப்வா பாதுகாப்புப் படை பயிற்சி முகாமை இலக்கு வைத்து ஹூதிகள் மூன்று பாலிட்டிக் ஏவுகணைகளை வீசித் தாக்குதல் நடத்தியுள்ளதாகப் பெயரைக் வெளியிட விரும்பாத உள்ளூர் அதிகாரி ஒருவர் தெரிவித்தார்.
இப்பகுதியில் சண்டை தீவிரம் அடைந்துள்ள நிலையில், ஷப்வா மாகாணத்தில் காயமடைந்தவர்கள் மற்றும் இரத்தம் தோய்ந்த உடல்கள் தரையில் சிதறிக்கிடப்பைக் காட்டும் வீடியோ காட்சிகள் வெளியாகியுள்ளன.
யேமனில் செங்கடலின் நுழைவாயிலான பாப் எல்-மண்டேப் ஜலசந்திக்கு அருகிலுள்ள பகுதிகளை நோக்கி ஹூதிகள் செப்டம்பர் மாதம் முன்னேறியதைத் தொடர்ந்து, சவுதி அரேபியா தலைமையிலான கூட்டமைப்பின் ஆதரவு பெற்ற சர்வதேச அளவில் அங்கீகரிக்கப்பட்ட அரசுக்கும் ஹூதிகளுக்கும் இடையே மோதல்கள் தீவிரமடைந்துள்ளன.
சவுதி படைகளால் நடத்தப்பட்டதாகக் கூறப்படும் பயிற்சி முகாமைத் தாக்கியதாக ஹூதி இராணுவப் பேச்சாளர் யஹ்யா சரீ எக்ஸ் தளத்தில் தெரிவித்தார். எனினும், சவுதி அதிகாரிகள் தரப்பில் உடனடியாக எந்தவிதப் பதிலும் அளிக்கப்படவில்லை.
ஏடன் வளைகுடாவை நோக்கியுள்ள ஆற்றல் வளம் நிறைந்த தெற்கு-மத்திய கடலோர மாகாணமான ஷப்வாவில், ஏமனின் மிகப்பெரிய தொழில் முதலீடான ‘பால்ஹாஃப்’ (Balhaf) திரவ இயற்கை எரிவாயு நிலையம் அமைந்துள்ளது.
ஹூதி கிளர்ச்சியாளர்கள் தலைநகர் சனாவைக் கைப்பற்றியதைத் தொடர்ந்து, அரசாங்கம் தெற்குப் பகுதிக்கு இடம்பெயர்ந்தது.
2022-இல் இரு தரப்பினரும் ஒரு போர் நிறுத்த ஒப்பந்தத்தை மேற்கொண்டனர். அந்த ஒப்பந்தம் இந்த ஆண்டு வரை நீடித்தது குறிப்பிடத்தக்கது.
