பலாலி மக்கள் தமது பூர்வீக வாழிடங்களையும் காணிகளையும் விடுவிக்கக் கோரி முன்னெடுத்து வரும் போராட்டம், கொட்டும் மழைக்கு மத்தியிலும் இன்றைய தினம் ஞாயிற்றுக்கிழமை(25.10.2026) 19ஆவது வாரமாகத் தொடர்ந்தது.
கடந்த 36 வருடங்களாகத் தமது காணிகளை இழந்துள்ள மக்கள், இராணுவத்தின் வசமுள்ள தமது சொந்தக் காணிகளை உடனடியாக விடுவிக்க வேண்டும் எனக் கோரியே இப்போராட்டத்தினை முன்னெடுத்து வருகின்றனர்.
தமது காணிகளில் இராணுவத்தினர் விவசாய நடவடிக்கைகளிலும் வர்த்தக நிலையங்களை அமைத்தும் சொந்தத் தேவைகளுக்காகப் பயன்படுத்தி வருகின்றனர் என மக்கள் சுட்டிக்காட்டுகின்றனர்.
தாம் நீண்ட காலமாக நிலங்களும் வீடுகளும் அற்று வாழ்ந்து வரும் நிலையில், தமது வீடுகளையும் காணிகளையும் விடுவிக்க வேண்டும் என அவர்கள் வலியுறுத்துகின்றனர்.
பிரதி ஞாயிற்றுக்கிழமைகளிலும் பலாலி சந்தியில் இப்போராட்டம் முன்னெடுக்கப்பட்டு வருகிறது.
அந்த வகையில், இன்றைய தினமும் கொட்டும் மழையையும் பொருட்படுத்தாது அப்பகுதி மக்கள் ஒன்றுகூடித் தமது போராட்டத்தை 19ஆவது வாரமாக முன்னெடுத்தனர்.
