கலகொட அத்தே ஞானசார தேரருக்கு உடனடியாக ஜனாதிபதி மன்னிப்பு வழங்கப்பட வேண்டும் என ஐக்கிய தேசியக் கட்சி வலியுறுத்தியுள்ளது.
இன்றையதினம் (26) வெளியிட்ட அறிக்கையில், மூன்று முக்கிய பௌத்த பீடங்களின் மகாநாயக்க தேரர்களின் தலையீட்டின் மூலம் இந்தப் பிரச்சினைக்குத் தீர்வு காணப்பட வேண்டும் என்றும் கட்சி கோரியுள்ளது.
மகாநாயக்க தேரர்களின் அறிவுறுத்தல்களைத் தொடர்ந்து, ஞானசார தேரரின் விடுதலையைக் கோரி முன்னெடுக்கப்பட்டு வந்த சத்தியாக்கிரகப் போராட்டம் தற்காலிகமாக இடைநிறுத்தப்பட்டுள்ளதாகவும் ஐக்கிய தேசியக் கட்சி தெரிவித்துள்ளது.
இதன்படி நீதிமன்ற அவமதிப்புக் குற்றத்திற்கான அதிகபட்ச சிறைத்தண்டனை 18 மாதங்கள் என முன்னாள் பிரதம நீதியரசர் சரத் என். சில்வா விளக்கியுள்ளதாகக் குறிப்பிட்டுள்ள கட்சி, ஞானசார தேரர் ஏற்கனவே இந்தக் குற்றத்திற்காகப் பத்து மாதங்களுக்கும் மேலாகச் சிறைத்தண்டனை அனுபவித்துள்ளதாகவும் சுட்டிக்காட்டியுள்ளது.
மேலும், மகாநாயக்க தேரர்களின் கோரிக்கையையும், ஞானசார தேரருக்கு முன்னர் வழங்கப்பட்ட ஜனாதிபதி மன்னிப்பையும் கட்சி தனது அறிக்கையில் குறிப்பிட்டுள்ளது. மற்றொரு ஜனாதிபதி மன்னிப்பு வழங்குவதற்கான சாத்தியக்கூறு குறித்து உச்ச நீதிமன்றத் தீர்ப்பிலும் குறிப்பிடப்பட்டுள்ளதாக ஐக்கிய தேசியக் கட்சி தெரிவித்துள்ளது.
அதேவேளை, ஞானசார தேரரின் விடுதலையைக் கோரிய போராட்டங்களில் பங்கேற்காத பௌத்த பிக்குகளுக்கு எதிராக நீதிமன்ற உத்தரவுகள் பெறப்பட்டமை தொடர்பாகவும் கட்சி அரசாங்கத்தை விமர்சித்துள்ளது.
மேலும், ஞானசார தேரரின் துறவற ஆடையை அகற்றுமாறு உத்தரவிட்டவர்கள் தொடர்பில் விசாரணை நடத்தப்பட வேண்டும் என்றும் கோரிக்கை விடுத்துள்ளது.
இந்த விவகாரத்திற்குத் தீர்வு காணும் வகையில், மகாநாயக்க தேரர்களின் பங்களிப்புடன் ஞானசார தேரருக்கு ஜனாதிபதி மன்னிப்பு வழங்குவது குறித்து அரசாங்கம் விரைவாக நடவடிக்கை எடுக்க வேண்டும் என்பதே ஐக்கிய தேசியக் கட்சியின் முக்கிய கோரிக்கை ஆகும்.
