மொன்றியலில் அதிகரித்து வரும் வாடகைத் தொகையைக் கட்டுப்படுத்துவதற்கும், குத்தகைதாரர்களின் உரிமைகளைப் பாதுகாப்பதற்கும், வாடகைக் கட்டுப்பாடு மற்றும் கட்டாய வாடகைப் பதிவேட்டு முறையை அறிமுகப்படுத்த வேண்டும் என நகராட்சி கியூபெக் மாகாண அரசாங்கத்திடம் கோரிக்கை விடுத்துள்ளது.
கடந்த 11 ஆண்டுகளாக மொன்றியலில் வசித்து வரும் நிக்கோலஸ் மரியன், தற்போது தனது குடியிருப்பை இழந்துவிடுவோமோ என்ற அச்சத்தில் இருப்பதாகத் தெரிவித்துள்ளார்.
அதிகரித்து வரும் வாடகையைச் செலுத்துவது தனது பொருளாதார சக்திக்கு அப்பாற்பட்டதாக மாறி வருவதாகவும், வெளியேற்றப்பட்டால் வீடற்ற நிலைக்குத் தள்ளப்படக்கூடும் என்றும் அவர் கவலை வெளியிட்டுள்ளார்.
தனது குடியிருப்புக் கட்டிடத்தில் மேற்கொள்ளப்படும் புனரமைப்புப் பணிகள் சில நேரங்களில் உண்மையான தேவைக்காக அல்லாமல், வாடகையை அதிகரித்து லாபம் ஈட்டுவதற்காகப் பயன்படுத்தப்படுவதாகவும் அவர் குற்றஞ்சாட்டியுள்ளார்.
இதற்குப் பதிலளித்த மொன்றியல் மேயர் சொரயா மார்டினெஸ் ஃபெர்ராடா, மரியனின் நிலைமை நகரில் அதிகரித்து வரும் வாடகை நெருக்கடியைப் பிரதிபலிப்பதாகக் குறிப்பிட்டார். வீடற்றவர்களுக்கு உதவுவது மட்டுமன்றி, மக்கள் வீடற்ற நிலைக்குத் தள்ளப்படுவதைத் தடுப்பதும் நகரின் முக்கிய நோக்கங்களில் ஒன்று என அவர் தெரிவித்தார்.
இதற்கிடையில், வாடகை உயர்வுகளைக் கட்டுப்படுத்துவதற்கான திருத்தப்பட்ட தீர்மானத்துக்கு மொன்றியல் நகர மன்றம் ஆதரவு தெரிவித்துள்ளது. பெரிய அளவிலான புனரமைப்புகள் மற்றும் குறிப்பிடத்தக்க முதலீடுகளுக்கான விதிவிலக்குகளுடன், மூன்று ஆண்டு சராசரி பணவீக்கத்தின் அடிப்படையில் வாடகை உயர்வுகளுக்கு வரம்பு விதிக்க வேண்டும் என நகராட்சி கோருகிறது.
அத்துடன், ஒரு குடியிருப்பின் முந்தைய வாடகைத் தொகை உள்ளிட்ட தகவல்களைப் புதிய குத்தகைதாரர்கள் அறிந்துகொள்ள உதவும் வகையில், பொதுமக்கள் எளிதில் அணுகக்கூடிய கட்டாய வாடகைப் பதிவேட்டை அறிமுகப்படுத்தவும் மாகாண அரசாங்கத்திடம் வலியுறுத்தப்பட்டுள்ளது.
கியூபெக் சட்டத்தின்படி, குத்தகை ஒப்பந்தத்தின் பிரிவு G-இல் கடந்த 12 மாதங்களில் செலுத்தப்பட்ட மிகக் குறைந்த வாடகைத் தொகையை வீட்டு உரிமையாளர்கள் குறிப்பிட வேண்டும். எனினும், இந்த நடைமுறை போதுமான அளவில் குத்தகைதாரர்களைப் பாதுகாக்கவில்லை என வீட்டுவசதி அமைப்புகள் சுட்டிக்காட்டுகின்றன.
விவ்ரே என் வில்லே அமைப்பும் லெஜர் நிறுவனமும் இணைந்து நடத்திய ஆய்வின்படி, கியூபெக்கில் 79 சதவீத வாடகைதாரர்களுக்கு, தங்களுடைய வீட்டு உரிமையாளர்கள் குத்தகை ஒப்பந்தத்தின் பிரிவு G-ஐ முறையாகப் பூர்த்தி செய்துள்ளார்களா என்பது தெரியவில்லை அல்லது அது நிரப்பப்படவில்லை என்பது தெரியும் எனக் கூறப்பட்டுள்ளது.
முந்தைய வாடகைத் தொகையை அறிய முடியாத நிலையில், நியாயமற்ற வாடகை உயர்வுகளை எதிர்த்துப் போராடுவது குத்தகைதாரர்களுக்குக் கடினமாகிறது என நிபுணர்கள் தெரிவிக்கின்றனர்.
மெக்கில் பல்கலைக்கழக நகர்ப்புறத் திட்டமிடல் பேராசிரியர் டேவிட் வாக்ஸ்முத், வாடகைப் பதிவேடு நடைமுறைக்கு வந்தாலும், சட்டப்படி அனுமதிக்கப்பட்ட வாடகை உயர்வுகள் பின்பற்றப்படுகின்றனவா என்பதைச் சரிபார்க்கும் பொறுப்பு குத்தகைதாரர்களிடமும் இருக்கும் எனக் குறிப்பிட்டுள்ளார்.
மொன்றியலில் குடும்பங்களில் மூன்றில் இரண்டு பங்கு வாடகை வீடுகளில் வசிப்பதாக நகர அதிகாரிகள் தெரிவிக்கின்றனர். எனவே, வாடகைக் கட்டுப்பாடு, வெளிப்படைத்தன்மை மற்றும் குத்தகைதாரர்களின் பாதுகாப்பு தொடர்பான இந்தக் கோரிக்கைகள், நகரின் வீடமைப்புப் பிரச்சினையில் முக்கியத்துவம் பெற்றுள்ளன.
