கியூபெக் மாகாணத்திலுள்ள வெஸ்ட்மவுண்ட் (Westmount) நகரசபையின் மேயர் மைக்கேல் ஸ்டெர்ன் (Michael Stern), அந்த நகரசபை அதிகாரிகள் மற்றும் ஊழியர்களிடம் மரியாதைக் குறைவாகவும் நாகரிகமற்ற முறையிலும் நடந்துகொண்டதாகக் கூறி, அவருக்கு எதிராக 7 அறநெறி மீறல் குற்றச்சாட்டுகள் சுமத்தப்பட்டுள்ளன.
கியூபெக் நகராட்சி ஆணையம் (Quebec Municipal Commission) இந்தக் குற்றச்சாட்டுகளை உத்தியோகபூர்வமாகப் பதிவு செய்துள்ளது.
கியூபெக் நகராட்சி ஆணையம் வெளியிட்டுள்ள மூன்று பக்க அறிக்கையின்படி, கடந்த ஏப்ரல் மற்றும் மே மாதங்களில் நடைபெற்ற கூட்டங்களின்போது, மேயர் மைக்கேல் ஸ்டெர்ன் இந்த விதிமீறல்களில் ஈடுபட்டதாகக் தெரிவிக்கப்பட்டுள்ளது.
குறிப்பாக, கடந்த ஏப்ரல் மாதம் 8, 9 ஆம் திகதிகள் மற்றும் மே மாதம் 22 ஆம் திகதிகளில் நடைபெற்ற பணிரீதியான சந்திப்புகளில், நகரசபையின் பிரதிப் பணிப்பாளர் நாயகம், நிதிப் பணிப்பாளர், மனிதவளப் பணிப்பாளர், சட்டச் சேவைப் பணிப்பாளர் மற்றும் நில முகாமைத்துவப் பணிப்பாளர் உள்ளிட்ட மூத்த அதிகாரிகளிடம், அந்த நகரசபை மேயர் கண்ணியமற்ற வார்த்தைகளைப் பயன்படுத்தியதாக ஆணையம் சுட்டிக்காட்டியுள்ளது.
மக்கள் பிரதிநிதி என்ற பதவியின் கௌரவத்தையும் கண்ணியத்தையும் சீர்குலைக்கும் வகையில் செயல்படக்கூடாது என்ற அடிப்படை விதியை மேயர் மீறியுள்ளதாக அறிக்கையில் குறிப்பிடப்பட்டுள்ளது.
இக்குற்றச்சாட்டுகள் தொடர்பில் கருத்து தெரிவித்துள்ள மேயர் மைக்கேல் ஸ்டெர்ன், தன் மீதான குற்றச்சாட்டுகளை சட்டரீதியாக எதிர்த்துப் போராடவுள்ளதாகத் தெரிவித்துள்ளார்.
