தமிழ் சினிமாவின் முன்னணி நடிகரான அஜித்குமாரின் சவால்களையும் மையமாகக் கொண்டு “Gladiators – In Pursuit of Challenges” என்ற பெயரில் ஒரு பிரமாண்ட ஆவணப்படம் உருவாகியுள்ளது. 90 நிமிடங்கள் ஓடக்கூடிய இந்தச் சிறப்புமிக்க ஆவணப்படத்தின் அதிகாரப்பூர்வ போஸ்டர் தற்போது வெளியாகி, சமூக வலைதளங்களில் ரசிகர்கள் மத்தியில் வைரலாகி வருகிறது.
இப்படத்தைப் பிரபல இயக்குநர் ஏ.எல்.விஜய் இயக்க, ஜீ.வி.பிரகாஷ்குமார் இசையமைக்கிறார். அஜித்குமார் ஸ்போர்ட்ஸ் சர்வீசஸ் எல்.எல்.சி நிறுவனம் இத்திரைப்படத்தைத் தயாரிக்கிறது. துபாய், அபுதாபி மற்றும் ஐரோப்பிய சர்வதேச மோட்டார் ஸ்போர்ட்ஸ் ரேசிங் சுற்றுகளில் (Asian Le Mans & 24H Series) நடிகர் அஜித்குமார் மற்றும் அவரது அணியினர் பங்கேற்ற பரபரப்பான தருணங்களை நேரடியாக இத்திரைப்படம் படம்பிடித்துள்ளது.
பந்தயக் களத்தில் அஜித்குமார் சந்தித்த பல தடைகள், பின்னடைவுகள் மற்றும் 2025 துபாய் 24H பந்தயத்தில் அவர் வென்ற வரலாற்றுச் சிறப்புமிக்க போடியம் சாதனை வரை, அவரது மோட்டார் ஸ்போர்ட்ஸ் வாழ்க்கையின் அனைத்து முக்கிய அனுபவங்களும் இதில் விரிவாக ஆவணப்படுத்தப்பட்டுள்ளன.
மேலும், இந்தியாவின் முன்னணி ஃபார்முலா 1 பந்தய வீரர் நரேன் கார்த்திகேயன், ஆதித்யா படேல் மற்றும் ஜூலியன் கெர்பி உள்ளிட்ட பல சர்வதேச ரேசிங் பிரபலங்களும் இதில் இடம்பெற்றுள்ளனர்.
90 நிமிடங்கள் மட்டுமே கொண்ட ஆவணப்படமாக இது உருவாக்கப்பட்டிருந்தாலும், அஜித் ரசிகர்களின் எதிர்பார்ப்பைப் பூர்த்தி செய்யும் வகையில் உலகம் முழுவதும் திரையரங்குகளில் பிரமாண்டமாக வெளியாகவுள்ளது குறிப்பிடத்தக்கது.
