சூப்பர்ஸ்டார் ரஜினிகாந்த் நடிப்பில் உருவாகியுள்ள ‘ஜெயிலர் 2’ திரைப்படத்தின் இரண்டாவது பாடலான ‘ஒன் சன் ஒன் மூன்’ (One Sun One Moon) வரும் செப்டம்பர் 25ஆம் திகதி வெளியாகும் எனத் தயாரிப்பு நிறுவனமான சன் பிக்சர்ஸ் அதிகாரபூர்வமாக அறிவித்துள்ளது.
இத்திரைப்படத்தின் முதலாவது பாடலான ‘அலே போலேலோ’ அண்மையில் வெளியாகி ரசிகர்களிடையே நல்ல வரவேற்பைப் பெற்றிருந்த நிலையில், தற்போது இரண்டாவது பாடல் குறித்த அறிவிப்பு வெளியாகியுள்ளது.
இத்திரைப்படம் எதிர்வரும் அக்டோபர் 15 ஆம் திகதி திரையரங்குகளில் வெளியாகவுள்ள நிலையில், படக்குழுவினர் தொடர்ச்சியான அறிவிப்புகளை வெளியிட்டு வருகின்றனர்.
நெல்சன் திலீப்குமார் இயக்கத்தில் ரஜினிகாந்த், ரம்யா கிருஷ்ணன், சிவராஜ்குமார், யோகிபாபு உள்ளிட்டோரின் நடிப்பில் 2023 ஆம் ஆண்டு வெளியான ‘ஜெயிலர்’ திரைப்படத்தின் பிரம்மாண்ட வெற்றியைத் தொடர்ந்து, தற்போது அதன் இரண்டாம் பாகமாக ‘ஜெயிலர் 2’ உருவாக்கப்பட்டுள்ளது.
முதல் பாகத்தைப் போலவே, இரண்டாம் பாகத்திலும் சிவராஜ்குமார், வித்யா பாலன், சூரஜ் வெஞ்சரமூடு உள்ளிட்ட பெரிய நட்சத்திரப் பட்டாளமே இணைந்து நடித்துள்ளனர்.
சன் பிக்சர்ஸ் சார்பில் கலாநிதி மாறன் தயாரித்துள்ள இத்திரைப்படத்திற்கு அனிருத் ரவிச்சந்தர் இசையமைத்துள்ளார் என்பது குறிப்பிடத்தக்கது.
