வடக்கு மாகாணத்தின் உற்பத்திப் பொருட்கள் மற்றும் சேவைகளை சர்வதேசச் சந்தைகளுடன் இணைக்கும் நோக்கில், ‘வடக்கு ஏற்றுமதியாளர்கள் மாநாடு 2027’ எதிர்வரும் ஜனவரி மாதம் 20, 21ஆம் திகதிகளில் யாழ்ப்பாணம் திருவள்ளுவர் பண்பாட்டு மையத்தில் நடைபெறவுள்ளது.
இந்த மாநாட்டைச் சிறப்பாக முன்னெடுப்பது தொடர்பான விசேட கலந்துரையாடல், வடக்கு மாகாண ஆளுநர் நா.வேதநாயகன் தலைமையில் செவ்வாய்க்கிழமை ஆளுநர் செயலகத்தில் நடைபெற்றது.
இலங்கை முகாமைத்துவக் கழகத்தின் ஏற்பாட்டில், கைத்தொழில் மற்றும் தொழில் முயற்சியாண்மை அபிவிருத்தி அமைச்சின் தலைமையில் இந்த மாநாடு ஏற்பாடு செய்யப்படுகிறது. இதற்கு யாழ்ப்பாணத்திலுள்ள இந்தியத் துணைத் தூதரகம், ஏற்றுமதி அபிவிருத்திச் சபை மற்றும் தேசிய ஏற்றுமதியாளர் சம்மேளனம் ஆகியன ஒத்துழைப்பு வழங்குகின்றன.
இந்த மாநாட்டின் ஊடாக 50க்கும் மேற்பட்ட நேரடி வர்த்தகச் சந்திப்புகளை ஏற்பாடு செய்வது இலக்காகக் கொள்ளப்பட்டுள்ளது.
இரண்டு நாட்கள் நடைபெறவுள்ள மாநாட்டின் முதல் நாளில், சர்வதேசச் சந்தை வாய்ப்புகள் தொடர்பான அமர்வுகளும், சிறிய மற்றும் நடுத்தரத் தொழில் முயற்சியாளர்களின் உற்பத்திப் பொருட்கள் மற்றும் சேவைகள் தொடர்பான அறிமுகங்களும் இடம்பெறவுள்ளன.
இரு நாட்களிலும் வர்த்தகக் கண்காட்சிகள் மற்றும் நேரடி வர்த்தகச் சந்திப்புகள் நடைபெறவுள்ளதுடன், இரண்டாம் நாளில் வர்த்தகப் புரிந்துணர்வு ஒப்பந்தங்களைக் கைச்சாத்திடவும் திட்டமிடப்பட்டுள்ளது.
இந்த முயற்சி கண்காட்சியுடன் மட்டும் மட்டுப்படுத்தப்படாமல், வடக்கு மாகாணத்தின் உற்பத்தித் திறனை அதிகரித்தல், ஏற்றுமதித் துறையை விரிவுபடுத்துதல் மற்றும் புதிய முதலீடுகளை ஈர்த்தல் ஆகியவற்றை நோக்கமாகக் கொண்டுள்ளது.
மேலும், நீண்டகால அடிப்படையில் நிரந்தரமான கண்காட்சி மற்றும் வர்த்தகத் தளமொன்றை உருவாக்குவதற்கான வாய்ப்புகளும் ஆராயப்படவுள்ளன.
குறித்த கலந்துரையாடலில் வடக்கு மாகாண ஆளுநரின் செயலாளர் மற்றும் இலங்கை முகாமைத்துவக் கழகத்தின் உறுப்பினர்கள் கலந்துகொண்டனர்.
