இத்தாலியின் மிலன் நகரிலுள்ள வரலாற்று சிறப்புமிக்க கதீட்ரல் சதுக்கத்தில் வாழ்க்கைச் செலவு உயர்வுக்கு எதிராக நடத்தப்பட்ட போராட்டம் வன்முறையாக மாறியதை அடுத்து, ஆர்ப்பாட்டக்காரர்கள் மீது காவல்துறையினர் கண்ணீர்ப்புகைப் பிரயோகம் மேற்கொண்டதாக அந்நாட்டு ஊடகங்கள் செய்தி வெளியிட்டுள்ளன.
கதீட்ரல் சதுக்கத்தில் திரண்ட போராட்டக்காரர்கள், காவல்துறையினர் மீது கற்கள் மற்றும் பல்வேறு பொருட்களை எறிந்து தாக்குதல் நடத்தியுள்ளனர்.
இதனைத் தொடர்ந்து கலகத் தடுப்புப் பொலிஸார் பதிலடி நடவடிக்கைகளில் ஈடுபட்டனர்.
கதீட்ரல் சதுக்கத்தின் ஒரு பகுதியில் அமைந்துள்ள ‘கலேரியா விட்டோரியோ எமானுவேல் II’ (Galleria Vittorio Emanuele II) என்ற ஆடம்பர வணிக வளாகப் பகுதிக்குள்ளும் முகமூடி அணிந்த போராட்டக்காரர்கள் ஊடுருவியதால், அவர்களை அப்புறப்படுத்தக் காவல்துறையினர் முயன்றனர்.
இந்த மோதல்கள் காரணமாக அப்பகுதியிலிருந்த கடைகள் உடனடியாக அடைக்கப்பட்டதுடன், சுற்றுலாப் பயணிகள் மத்திய பகுதியிலிருந்து பாதுகாப்பாக வெளியேறினர்.
வன்முறைச் சம்பவங்களைத் தொடர்ந்து மத்திய டுவோமோ (Duomo) மெட்ரோ ரயில் நிலையம் மூடப்பட்டது. இக்கலவரத்தில் பலர் காயமடைந்துள்ளதுடன், சிலர் கைது செய்யப்பட்டுள்ளதாகவும் இத்தாலிய ஊடகங்கள் தெரிவித்துள்ளன.
இதேவேளை, வடக்கு இத்தாலிய நகரமான பொலோக்னாவில் (Bologna) நடைபெற்ற மற்றொரு போராட்டமும் வன்முறையாக மாறியது.
அங்கு திரண்ட கூட்டத்தைக் கலைக்கக் காவல்துறையினர் நீர் பாய்ச்சி அடிக்கும் வாகனங்களைப் பயன்படுத்தியதுடன், ஏழு பேரைக் கைது செய்துள்ளதாக அன்சா (ANSA) செய்தி நிறுவனம் செய்தி வெளியிட்டுள்ளது.
வாழ்க்கைச் செலவு உயர்வு மற்றும் சீரழிந்து வரும் பொதுச் சேவைகள் காரணமாக அண்டை நாடான பிரான்ஸிலும் பல்லாயிரக்கணக்கான மக்கள் வீதிகளில் இறங்கிப் போராட்டம் நடத்தி வரும் நிலையில், இத்தாலியிலும் இவ்வாறான வன்முறைச் சம்பவங்கள் பதிவாகியுள்ளன.
