தொடர் விடுமுறை: தொடருந்து நிலையங்களில் கூட்டம்!

ஆயுத பூஜை மற்றும் விஜயதசமியை முன்னிட்டுத் தொடர் விடுமுறை வருவதால், சென்னையில் வசிக்கும் வெளியூர் மக்கள் தங்களது சொந்த ஊர்களுக்குப் புறப்பட்டு வருகின்றனர். இதனால் சென்னை சென்டிரல், எழும்பூர் மற்றும் தாம்பரம் தொடருந்து நிலையங்களில் பயணிகள் கூட்டம் அலைமோதி வருகிறது.

சனிக்கிழமை (17.10.2026) மற்றும் ஞாயிற்றுக்கிழமை (18.10.2026) விடுமுறையைத் தொடர்ந்து, திங்கட்கிழமை ஆயுத பூஜை மற்றும் செவ்வாய்க்கிழமை விஜயதசமி ஆகிய இரு நாட்கள் அரசு விடுமுறையாகும். இதனால் தொடர்ச்சியாக நான்கு நாட்கள் விடுமுறை கிடைப்பதால், மக்கள் திரளாகச் சொந்த ஊர் நோக்கிப் பயணிக்கத் தொடங்கியுள்ளனர்.

முன்பதிவு செய்யாத பயணிகள், முன்பதிவு இல்லாத பெட்டிகள் மூலம் செல்ல முயன்றதால் தொடருந்து நிலையங்களின் நடைமேடைகள் பயணிகளால் நிரம்பி வழிந்தன.

அதேபோன்று, சென்னை கிளாம்பாக்கத்திலும் பெருமளவிலான பயணிகள் காணப்பட்டனர். சென்னையில் வசிக்கும் மக்கள் சொந்த ஊர்களுக்குச் செல்வதற்காகத் தமிழக அரசு சார்பில் ஏராளமான சிறப்புப் பேருந்துகளும் இயக்கப்பட்டு வருகின்றன.

இதனிடையே, மாலையில் பெய்த கனமழை காரணமாகத் திருச்சி செல்லும் சாலையில் கடும் போக்குவரத்து நெரிசல் ஏற்பட்டது.

இதனால் வாகனங்கள் மெதுவாக ஊர்ந்து செல்லும் நிலை உருவானது. சில பயணிகள் வெள்ளிக்கிழமை விடுமுறை எடுத்துக்கொண்டு முந்தைய தினமே புறப்பட்டுச் சென்ற நிலையில், சனிக்கிழமை பணிபுரிய வேண்டியவர்கள் நாளை மாலைக்குப் பின்னரே புறப்படுவார்கள் என எதிர்பார்க்கப்படுகிறது.