சட்டவிரோதமான முறையில் இறக்குமதி செய்யப்பட்ட சுமார் 2 கோடி ரூபாய் பெறுமதியான 07 மோட்டார் சைக்கிள்களை யாழ். மாவட்ட குற்றத்தடுப்பு பிரிவினர் கைப்பற்றியுள்ளனர்.
குறித்த மோட்டார் சைக்கிள்களை உடைமையில் வைத்திருந்த குற்றச்சாட்டில் நபர் ஒருவரும் கைது செய்யப்பட்டுள்ளார்.
யாழ்ப்பாணம், கல்வியங்காட்டுப் பகுதியை அண்மித்த பகுதியில், மர விற்பனை நடத்தும் நபர் ஒருவரின் விற்பனை நிலையத்தினுள், அதீத திறன் (CC) கொண்ட மோட்டார் சைக்கிள்கள் நிற்பதாக மாவட்ட குற்றத்தடுப்பு பிரிவினருக்குத் தகவல் கிடைத்துள்ளது.
தத்தகவலின் பிரகாரம் சனிக்கிழமையன்று குறித்த விற்பனை நிலையத்தை முற்றுகையிட்டு சோதனை நடவடிக்கைகளை முன்னெடுத்த போது, அதனுள் இருந்து 07 அதிக திறன் கொண்ட மோட்டார் சைக்கிள்களைப் பொலிஸார் கைப்பற்றினர்.
அவற்றில் நான்கு மோட்டார் சைக்கிள்களுக்கு எவ்வித பதிவுகளும் இல்லாத நிலையில், ஏனைய மூன்று மோட்டார் சைக்கிள்களுக்கும் போலி பதிவுகள் மேற்கொள்ளப்பட்டுள்ளமை கண்டறியப்பட்டது.
அதனை அடுத்து 07 மோட்டார் சைக்கிள்களையும் கைப்பற்றிய பொலிஸார், அவற்றை உடைமையில் வைத்திருந்த நபரையும் கைது செய்து, மேலதிக சட்ட நடவடிக்கைக்காக, கோப்பாய் பொலிசாரிடம் ஒப்படைத்துள்ளனர்.
கைது செய்யப்பட்ட நபர் வெளிநாடொன்றில் இருந்து திரும்பி வந்தவர் எனவும், அத்துடன் அதிக பணத்தினை நாட்டிற்குள் கொண்டு வந்து பல்வேறு வியாபாரங்களை முன்னெடுப்பவர் என்றும், பொலிஸ் உயர் அதிகாரிகளுடன் நல்லுறவினையும் பேணி வந்தவர் என்றும் தெரிவிக்கப்படுகிறது.
