தமிழ்நாடு காவல்துறையில் தமிழுக்கே இடமில்லை என்ற நிலை ஏற்பட்டுள்ளதாகவும், தவெக அரசுக்கு முதுகெலும்பு ஏதேனும் இருக்கிறதா என்றும் திமுக கேள்வி எழுப்பியுள்ளது.
ஒவ்வொரு ஆண்டும் அக்டோபர் 21ஆம் தேதி தேசிய காவலர் நினைவு தினம் அனுசரிக்கப்படுகிறது.
1959ஆம் ஆண்டு அக்டோபர் 21ஆம் நாள் லடாக் எல்லையில் சீனப் படைகளுடன் நடந்த தாக்குதலில் உயிர் தியாகம் செய்த 10 இந்தியக் காவலர்களை நினைவுபடுத்தும் வகையில் இத்தினம் கடைபிடிக்கப்படுகிறது.
இதனை முன்னிட்டுச் சென்னையில் உள்ள மாநில காவல்துறை தலைமையகத்தில் நடைபெற்ற நிகழ்ச்சியில் காவல்துறை சேவையில் வீரமரணம் அடைந்தவர்களுக்கு முதலமைச்சர் சி. ஜோசப் விஜய் மலர் அஞ்சலி செலுத்தினார்.
இந்நிலையில், இந்நிகழ்வில் கலந்துகொண்ட காவலர்கள் அணிந்திருந்த பேட்ஜில் இந்தி மற்றும் ஆங்கிலத்தில் காவல்துறை கொடி நாள் என எழுதப்பட்டிருந்ததாகக் கூறப்படுகிறது.
இதுதொடர்பாகத் திமுக தரப்பில் வெளியிடப்பட்டுள்ள அறிக்கையில் தெரிவிக்கப்பட்டுள்ளதாவது,
“தமிழும், ஆங்கிலமும் தான் தமிழ்நாட்டின் இருமொழிக் கொள்கை. தவெக ஆட்சியில் அது ‘இந்தியும் ஆங்கிலமும்’ என்ற இருமொழிக் கொள்கையாக மாறிவிட்டதா? காவல் துறை கொடி நாளில், இந்தியும், ஆங்கிலமும் மட்டும் இடம்பெற்றுள்ள பேட்ஜை தமிழ்நாடு காவலர்கள் சீருடையில் அணிய வேண்டும் என்று கட்டாயப்படுத்தப்படுவது ஏன்? காவல்துறை என்பது மாநில அரசின் அதிகாரத்திற்குட்பட்ட துறை என்பதை, அந்தத் துறையைத் தனது நேரடிப் பொறுப்பில் வைத்திருக்கும் முதலமைச்சர் அறிவாரா? அல்லது மாநிலத்தின் மொழி உரிமையோடு சேர்த்து, காவல்துறை மீதான தனது அரசியல் பொறுப்பையும் ஒன்றிய அரசிடம் ஒப்படைத்து சரணடைந்துவிட்டாரா? தமிழ்நாட்டில் தமிழ் கேட்பது கூட இன்று ஒரு கேள்வியாக வேண்டிய நிலை வந்திருப்பதே வேதனை. பல ஆண்டுகளாக ஒன்றிய அரசு அழுத்தத்தைக் கொடுத்த நிலையில் திராவிட மாடல் அரசு ஒருபோதும் அதை ஏற்காமல் இருந்தது. இன்றைய அரசுக்கு முதுகெலும்பு ஏது!” என அதில் குறிப்பிடப்பட்டுள்ளது.
