தமது பூர்வீகக் காணிகளை விடுவித்து, மீள்குடியேறுவதற்கு அனுமதி வழங்குமாறு கோரி, யாழ்ப்பாணம் வசாவிளான் பகுதி மக்கள் முன்னெடுத்து வரும் தொடர் போராட்டம் ஆறாவது வாரமாகவும் இன்று ஞாயிற்றுக்கிழமை முன்னெடுக்கப்பட்டது.
கடந்த 36 ஆண்டுகளுக்கு முன்னர் தமது பூர்வீகக் காணிகளில் இருந்து வெளியேற்றப்பட்ட மக்கள், இதுவரை தமது காணிகளில் மீள்குடியேறுவதற்கு அனுமதி கிடைக்கவில்லை எனத் தெரிவிக்கின்றனர்.
இந்நிலையில், தமது காணிகளை விரைவில் விடுவித்து, அங்கு மீள்குடியேறுவதற்கு அதிகாரிகள் அனுமதி வழங்க வேண்டும் என வலியுறுத்தி மக்கள் போராட்டத்தில் ஈடுபட்டு வருகின்றனர்.
இதனிடையே, யாழ்ப்பாணம் வலிகாமம் வடக்குப் பகுதியில் 2 ஆயிரத்து 34 தசம் 97 ஏக்கர் தனியார் காணிகள் இன்னமும் விடுவிக்கப்பட வேண்டியுள்ளதாகத் தெரிவிக்கப்படுகிறது.
இதற்கமைய, ஒவ்வொரு வெள்ளிக்கிழமையும் மயிலிட்டி பகுதி மக்களும், ஞாயிற்றுக்கிழமைகளில் பலாலி மற்றும் வசாவிளான் பகுதி மக்களும் தமது காணிகளை விடுவிக்குமாறு கோரி தொடர் போராட்டங்களை முன்னெடுத்து வருகின்றனர்.
இந்நிலையில், கடந்த வெள்ளிக்கிழமை இராணுவத்தினரின் கட்டுப்பாட்டிலிருந்த 1 தசம் 29 ஏக்கர் தனியார் காணி விடுவிக்கப்பட்டுள்ளது.
இதனையடுத்து, வலிகாமம் வடக்குப் பகுதியில் இன்னமும் 2 ஆயிரத்து 33 தசம் 68 ஏக்கர் தனியார் காணிகள் விடுவிக்கப்பட வேண்டியுள்ளதாகத் தெரிவிக்கப்படுகிறது.
தமது பூர்வீக நிலங்களில் மீள்குடியேறும் உரிமையை வலியுறுத்தி, வசாவிளான் உள்ளிட்ட பகுதிகளைச் சேர்ந்த மக்கள் தமது போராட்டத்தைத் தொடர்ந்து முன்னெடுத்து வருகின்றனர்.
