இந்தியாவுடனான இருதரப்பு வர்த்தக ஒப்பந்தம் இறுதி செய்யப்படுவதற்கு மிக அருகில் உள்ளதாகவும், அதற்கான பணிகள் 99 சதவீதம் நிறைவடைந்துவிட்டதாகவும் அமெரிக்கா தெரிவித்துள்ளது.
அமெரிக்க அதிபர் டொனால்ட் டிரம்ப் மற்றும் அமெரிக்க வெளியுறவுத்துறை செயலாளர் மார்க்கோ ரூபியோ ஆகியோர் இத்தகவலை உறுதிப்படுத்தியுள்ளனர்.
மற்ற நாடுகளுடன் அமெரிக்கா இதுவரை செய்துகொண்ட வர்த்தக ஒப்பந்தங்களைக் காட்டிலும், இந்தியாவுடனான இந்த ஒப்பந்தம் முற்றிலும் மாறுபட்ட ஒரு புதிய வர்த்தகக் கட்டமைப்பாக அமையும் என்றும் அவர்கள் சுட்டிக்காட்டியுள்ளனர்.
வெள்ளை மாளிகையின் ஓவல் அலுவலகத்தில் செய்தியாளர்களைச் சந்தித்துப் பேசிய அதிபர் டொனால்ட் டிரம்ப், வர்த்தக ஒப்பந்தத்தை மேற்கொண்டிருப்பதற்கு இரு நாடுகளும் மிகுந்த விருப்பத்துடன் உள்ளதாகவும், விரைவில் இந்த ஒப்பந்தம் அதிகாரப்பூர்வமாகக் கைச்சாத்தாகும் என்றும் குறிப்பிட்டார்.
முன்னதாக, அமெரிக்க வெளியுறவுத்துறை செயலாளர் மார்க்கோ ரூபியோ இந்திய ஊடகமொன்றுக்கு அளித்த பிரத்யேகப் பேட்டியிலும் இதே கருத்தைப் பகிர்ந்திருந்தார்.
இரு நாடுகளுக்கும் இடையிலான ஒப்பந்தம் சார்ந்த ஒட்டுமொத்தப் பணிகளில் 99 சதவீதம் முடிந்துவிட்டதாக அவர் தனது பேட்டியில் உறுதிப்படுத்தியிருந்தமை குறிப்பிடத்தக்கது.
