ரூ.100 கோடி கல்வி நிறுவனங்களுக்கு அங்கீகாரம் வழங்கும் லஞ்சப் புகார் வழக்கில், வரும் 6ஆம் தேதி வரை நீதிமன்ற காவலில் அன்பில் மகேஷைச் சிறையில் அடைக்க நீதிமன்றம் உத்தரவிட்டுள்ளது.
ரூ.100 கோடி ஊழல் வழக்கில் கைது செய்யப்பட்ட முன்னாள் கல்வித்துறை அமைச்சர் அன்பில் மகேஷ், போலீஸ் கஸ்டடி விசாரணை முடிந்த நிலையில் மருத்துவமனையில் மருத்துவப் பரிசோதனை செய்யப்பட்டுச் சிறப்பு நீதிமன்றத்தில் ஆஜர்படுத்தப்பட்டார்.
அப்போது, போலீஸ் காவலில் இருந்தபோது உணவு, உடை எல்லாம் முறையாக வழங்கப்பட்டனவா என்றும், விசாரணையின்போது காவல்துறையினர் துன்புறுத்தினார்களா என்றும் அன்பில் மகேஷிடம் நீதிபதி கேள்வி எழுப்பினார்.
இதற்குப் பதிலளித்த அவர், தம்மைக் காவல்துறையினர் துன்புறுத்தவில்லை என்றும், உணவு மற்றும் உடை முறையாக வழங்கப்பட்டதாகவும் நீதிபதியிடம் கூறினார்.
அன்பில் மகேஷின் உடல்நிலை குறித்த மருத்துவ அறிக்கையையும் காவல்துறையினர் நீதிபதியிடம் தாக்கல் செய்தனர்.
விசாரணை நிறைவடைந்ததைத் தொடர்ந்து, அன்பில் மகேஷிை வரும் 6ஆம் தேதி வரை புழல் சிறையில் அடைக்கச் சிறப்பு நீதிமன்றம் உத்தரவிட்டது.
இதற்கிடையில், அன்பில் மகேஷ் ஜாமீன் கோரி தாக்கல் செய்த மனு மீதான காவல்துறை பதில் மனுவை நாளை காலை வழங்குமாறு நீதிபதி உத்தரவிட்டுள்ளார்.
காவல்துறையின் பதில் மனுவை முன்கூட்டியே வழங்கினால் நாளை வாதிட எளிமையாக இருக்கும் என்ற அன்பில் மகேஷின் தரப்பு கோரிக்கை ஏற்றுக்கொள்ளப்பட்டது.
மேலும், சிறைக்கு அழைத்துச் செல்வதற்கு முன்பாக 10 நிமிடங்கள் வழக்கறிஞர்களுடன் பேசுவதற்கு அவருக்கு அனுமதி வழங்கப்பட்டுள்ளது.
