கியூபெக் மாகாணத் தேர்தல் – இறுதிக்கட்டத்தை எட்டும் பிரசாரம்

கியூபெக் மாகாணத் தேர்தலுக்கான பிரசாரம் தற்போது இறுதிக்கட்டத்தை எட்டியுள்ளது.

அக்டோபர் 5ஆம் தேதி வாக்களிப்பு நடைபெறவுள்ள நிலையில், பிரதான அரசியல் கட்சிகளின் தலைவர்கள் தங்களது தேர்தல் பிரசார நடவடிக்கைகளை தீவிரப்படுத்தியுள்ளனர்.

குடியேற்றம், செயற்கை நுண்ணறிவு, அரசாங்கத்தின் பொறுப்புக்கூறல் மற்றும் போக்குவரத்து உள்ளிட்ட பல்வேறு விவகாரங்கள் தற்போது தேர்தல் பிரசாரத்தில் முக்கிய இடத்தைப் பிடித்துள்ளன.

குடியேற்ற விவகாரத்தில், Parti Québécois கட்சி கியூபெக் மாகாணத்தில் தற்காலிக குடியேற்றவாசிகளின் எண்ணிக்கையை கணிசமாகக் குறைப்பதற்கான திட்டத்தை முன்வைத்துள்ளது. அந்தக் கட்சி தற்போது கியூபெக்கில் உள்ள சுமார் 500,000 தற்காலிக குடியேற்றவாசிகளின் எண்ணிக்கையை 250,000 ஆகக் குறைக்க வேண்டும் என முன்மொழிந்துள்ளது.

இதற்கு Québec Liberal Party உள்ளிட்ட எதிர்க்கட்சிகள் விமர்சனங்களை முன்வைத்துள்ளன. இந்தக் கொள்கை கியூபெக் மாகாணத்திற்கு பாதிப்பை ஏற்படுத்தக்கூடும் என Liberal Party தலைவர் Charles Milliard தெரிவித்துள்ளார்.

இதேவேளை, செயற்கை நுண்ணறிவின் பயன்பாடு மற்றும் அதன் தாக்கங்கள் தொடர்பான விவாதங்களும் தேர்தல் பிரசாரத்தில் முக்கியத்துவம் பெற்றுள்ளன.

மேலும், மாகாணத்தின் போக்குவரத்து கட்டமைப்பு மற்றும் அரசாங்கத்தின் செயல்பாடுகள் தொடர்பான கேள்விகளும் கட்சித் தலைவர்களால் முன்வைக்கப்பட்டு வருகின்றன.

இதனிடையே,கியூபெக் தேர்தலில் வெளிநாட்டு தலையீடு இடம்பெறக்கூடும் என்ற குற்றச்சாட்டுகளும் தற்போது கவனத்தை ஈர்த்துள்ளன. இந்த விவகாரம் தொடர்பாக Coalition Avenir Québec தலைவர் Christine Fréchette, கனடா பிரதமர்மார்க் கார்னியை யை சந்திக்க கோரியுள்ளதுடன், கனேடிய பாதுகாப்பு புலனாய்வு சேவையான CSIS-ஐயும் தொடர்புகொண்டுள்ளதாக தெரிவிக்கப்பட்டுள்ளது.

அதேவேளை, தேர்தலுக்கு இன்னும் பத்து நாட்கள் மட்டுமே உள்ள நிலையில், கியூபெக்கின் முக்கிய அரசியல் கட்சிகளின் தலைவர்கள் வாக்காளர்களை கவரும் வகையில் இறுதிக்கட்ட பிரசார நடவடிக்கைகளில் ஈடுபட்டு வருகின்றனர்.

அக்டோபர் 5ஆம் தேதி நடைபெறவுள்ள இந்தத் தேர்தலில் கியூபெக் வாக்காளர்கள் மாகாணத்தின் அடுத்த அரசாங்கத்தைத் தெரிவுசெய்யவுள்ளனர்.