தென்னிந்திய திரைப்பட எழுத்தாளர்கள் சங்கத்தின் புதிய நிர்வாகிகளின் வேண்டுகோளை ஏற்று, முன்னணி பாடலாசிரியரும் கவிஞருமான கவிப்பேரரசு வைரமுத்து அச்சங்கத்தின் ஆயுட்கால உறுப்பினராக முறைப்படி இணைந்துள்ளார்.
தென்னிந்திய திரைப்பட எழுத்தாளர்கள் சங்கத்தின் சமீபத்திய தேர்தலுக்குப் பின் பொறுப்பேற்றுக்கொண்ட தலைவரும் இயக்குநருமான சேரன், பொதுச்செயலாளரும் எழுத்தாளருமான பட்டுக்கோட்டை பிரபாகர், பொருளாளரும் இயக்குநருமான ஆர். சுந்தர்ராஜன், துணைத்தலைவரும் பாடலாசிரியருமான சினேகன் மற்றும் செயற்குழு உறுப்பினர் இயக்குநர் கே.பி.பி. நவீன் ஆகிய முக்கிய நிர்வாகிகள் கவிப்பேரரசு வைரமுத்துவை நேரில் சந்தித்தனர்.
திரையுலகில் பல தசாப்தங்களாகத் தன் எழுத்தால் முத்திரை பதித்து வரும் மூத்த படைப்பாளியான வைரமுத்து, எழுத்தாளர்கள் சங்கத்தில் இணைந்து தங்களுக்கு வழிகாட்ட வேண்டும் என நிர்வாகிகள் அன்போடு வேண்டுகோள் விடுத்தனர்.
அவர்களின் வேண்டுகோளைத் தட்டாமல் ஏற்றுக்கொண்ட கவிஞர் வைரமுத்து, எழுத்தாளர் சங்கத்தில் இணையச் சம்மதம் தெரிவித்தார்.
இதனைத் தொடர்ந்து, சங்கத்தின் விதிமுறைகளின்படி ரூ. 1 லட்சம் கட்டணமாகச் செலுத்தி, தென்னிந்திய திரைப்பட எழுத்தாளர்கள் சங்கத்தின் ஆயுட்கால உறுப்பினராக அவர் முறைப்படி இணைந்து கொண்டார்.
இதற்கான உறுப்பினர் படிவம் மற்றும் தொகையை அவர் சங்க நிர்வாகிகளிடம் நேரில் ஒப்படைத்தார்.
வைரமுத்து போன்ற ஒரு மாபெரும் ஆளுமை தங்களது சங்கத்தில் உறுப்பினராக இணைந்திருப்பது, ஒட்டுமொத்த எழுத்தாளர்கள் சங்கத்திற்கும் கிடைத்த பெரும் கௌரவம் மற்றும் பெருமை என்று சங்கத் தலைவர் சேரன் மற்றும் பொதுச்செயலாளர் பட்டுக்கோட்டை பிரபாகர் ஆகியோர் நெகிழ்ச்சியுடன் தெரிவித்துள்ளனர்.
