யாழ்ப்பாணத்தில் அமைந்துள்ள ஈழ மக்கள் ஜனநாயகக் கட்சியின் தலைமை அலுவலகத்தில், குற்றப் புலனாய்வுத் திணைக்களத்தினர் நீண்ட நேரம் சோதனை நடவடிக்கையில் ஈடுபட்டுள்ளனர்.
யாழ்ப்பாணம் ஸ்ரான்லி வீதியில், முன்னர் ஸ்ரீதர் திரையரங்கு இயங்கிய கட்டடத்தில் அமைந்துள்ள கட்சி அலுவலகத்திலேயே இந்தத் தேடுதல் நடவடிக்கை முன்னெடுக்கப்பட்டுள்ளது.
குற்றப் புலனாய்வுத் திணைக்களத்திற்குக் கிடைத்த இரகசியத் தகவலின் அடிப்படையில், யாழ்ப்பாணம் நீதவான் நீதிமன்றத்தின் தேடுதல் அனுமதியைப் பெற்று இந்த நடவடிக்கை மேற்கொள்ளப்பட்டதாகத் தெரிவிக்கப்படுகிறது.
தேடுதல் நடவடிக்கையைத் தொடர்ந்து, கட்சியின் செயலாளர் டக்ளஸ் தேவானந்தா மற்றும் நிர்வாகப் பொறுப்பாளர் ஆகியோரிடம் வாக்குமூலங்களும் பெறப்பட்டுள்ளன.
கடந்த 2001ஆம் ஆண்டு டக்ளஸ் தேவானந்தாவின் தனிப்பட்ட பயன்பாட்டிற்காக இராணுவத்தினால் வழங்கப்பட்ட துப்பாக்கி, 2019ஆம் ஆண்டு திட்டமிட்ட குற்றச் செயல்களுடன் தொடர்புடைய மாகந்துர மதூஷிடம் இருந்து கண்டெடுக்கப்பட்ட சம்பவம் தொடர்பிலும் விசாரணைகள் இடம்பெற்று வருகின்றன.
இந்த விவகாரம் தொடர்பான விசாரணைகளுக்காக டக்ளஸ் தேவானந்தா கடந்த ஆண்டு டிசம்பர் மாதம் கைது செய்யப்பட்டு விளக்கமறியலில் வைக்கப்பட்ட பின்னர் பிணையில் விடுவிக்கப்பட்டிருந்தார்.
அதேவேளை, ஈழ மக்கள் ஜனநாயகக் கட்சியினரால் மீளக் கையளிக்கப்பட்ட துப்பாக்கிகள் உள்ளிட்ட ஆயுதங்கள் தொடர்பாகவும் விசாரணைகள் முன்னெடுக்கப்பட்டுள்ளன.
மேலும், உயிர்த்த ஞாயிறு தாக்குதல் தொடர்பில் தகவல்களை வெளியிட்ட ஆசாத் மௌலானாவுக்கு வேலைவாய்ப்பு வழங்கியமை தொடர்பாகவும் அண்மையில் டக்ளஸ் தேவானந்தாவிடம் குற்றப் புலனாய்வுத் திணைக்களத்தினர் விசாரணைகளை மேற்கொண்டிருந்தனர்.
இவ்வாறான பின்னணியில், யாழ்ப்பாணத்தில் அமைந்துள்ள டக்ளஸ் தேவானந்தாவின் கட்சித் தலைமை அலுவலகத்தில் தற்போது சோதனை நடவடிக்கை முன்னெடுக்கப்பட்டுள்ளமை குறிப்பிடத்தக்கது.
