யாழில் மீற்றர் வட்டி வசூலிப்பு மற்றும் பொதுமக்களை அச்சுறுத்தும் வகையில் செயற்பட்டமை உள்ளிட்ட குற்றச்சாட்டுகளின் கீழ், இளைஞர்கள் அறுவர் பொலிஸாரால் கைது செய்யப்பட்டுள்ளனர்.
யாழ்ப்பாண நகரை அண்டிய பகுதிகளில் வசிக்கும் வன்முறைக் கும்பலைச் சேர்ந்தவர்கள் எனக் கூறப்படும் குறித்த அறுவரில், இருவருக்கு எதிராக நீதிமன்றத்தினால் திறந்த பிடியாணை பிறப்பிக்கப்பட்டிருந்த நிலையிலேயே இந்தக் கைது நடவடிக்கை முன்னெடுக்கப்பட்டுள்ளது.
யாழ்ப்பாண நகரை அண்மித்த பகுதிகளில் இளைஞர்கள் சிலர் குழுவாகச் செயற்பட்டு, வன்முறைகளில் ஈடுபடுவதாகவும், அடாவடியாக மீற்றர் வட்டி வசூலிப்பதாகவும் பொலிஸாருக்குப் பல்வேறு முறைப்பாடுகள் கிடைத்துள்ளன.
மேலும், எரிபொருள் நிரப்பு நிலையங்களில் நடைமுறையிலுள்ள QR குறியீட்டு முறையை மீறி, ஊழியர்களை அச்சுறுத்தி தமது மோட்டார் சைக்கிள்கள் மற்றும் கார்களுக்கு எரிபொருள் நிரப்பிச் செல்வதாகவும் முறைப்பாடுகள் முன்வைக்கப்பட்டுள்ளன.
இந்நிலையில், பொலிஸார் முன்னெடுத்த விசேட நடவடிக்கையின்போது குறித்த இளைஞர் குழுவைச் சேர்ந்த அறுவர் கைது செய்யப்பட்டுள்ளனர்.
கைது செய்யப்பட்டவர்களில் இருவருக்கு எதிரான வழக்கு விசாரணைகள் நீதிமன்றங்களில் நிலுவையில் உள்ளதாகவும், அவர்கள் வழக்கு விசாரணைகளுக்கு சமூகமளிக்காத காரணத்தினால் திறந்த பிடியாணை பிறப்பிக்கப்பட்டிருந்ததாகவும் பொலிஸார் தெரிவித்துள்ளனர்.
கைது செய்யப்பட்ட அறுவரையும் யாழ்ப்பாணம் பொலிஸ் நிலையத்தில் தடுத்து வைத்து பொலிஸார் மேலதிக விசாரணைகளை முன்னெடுத்து வந்துள்ளனர்.
இதேவேளை, குறித்த குழுவின் தலைவரெனச் சந்தேகிக்கப்படும் நபர் உள்ளிட்ட ஒன்பது பேர், கடந்த மாதம் கார் மற்றும் மோட்டார் சைக்கிள்களில் பயணித்துக்கொண்டிருந்தபோது பெருந்தொகைப் பணத்துடன் கைது செய்யப்பட்டிருந்தமையும் குறிப்பிடத்தக்கது.
