யாழ்ப்பாண மாவட்டத்தில் மழைக்காலங்களில் வெள்ளத்தால் பாதிக்கப்படும் பகுதிகளை அடையாளம் கண்டு, பாதிப்புகளைக் குறைப்பதற்கான முன்னெச்சரிக்கை நடவடிக்கைகளை முன்னெடுக்குமாறு கடற்றொழில் அமைச்சர் இராமலிங்கம் சந்திரசேகர் அதிகாரிகளுக்கு வலியுறுத்தியுள்ளார்.
யாழ்ப்பாண மாவட்டச் செயலகக் கேட்போர் கூடத்தில், அமைச்சர் இராமலிங்கம் சந்திரசேகர் தலைமையில் நடைபெற்ற மாவட்ட மட்டத் திட்டமிடல் கூட்டத்தின்போதே அவர் இதனைத் தெரிவித்துள்ளார்.
இதன்போது, குடிநீர் வளங்களைப் பாதுகாப்பதுடன், ஒவ்வொரு பிரதேசத்திலும் காணப்படும் குடிநீர்த் தேவைகள், நீர் விநியோகப் பிரச்சினைகள் மற்றும் அவற்றுக்கான தீர்வுகள் தொடர்பான தகவல்களைப் பிரதேச ரீதியாகத் திரட்ட வேண்டியதன் அவசியத்தையும் அமைச்சர் வலியுறுத்தியுள்ளார்.
அத்துடன், வீடமைப்புத் திட்டங்களைத் தயாரிக்கும்போது, வீடற்ற குடும்பங்களின் நிலைமைகள் மற்றும் பயனாளிகளைத் தெரிவுசெய்வதற்கான நடைமுறைகள் தொடர்பில் துல்லியமான தகவல்களைப் பெற்றுக்கொள்ள வேண்டும் எனவும் அவர் தெரிவித்துள்ளார்.
காணியற்ற மற்றும் வீடற்ற மக்களின் பிரச்சினைகளுக்கு முன்னுரிமை வழங்கப்பட வேண்டும் எனக் குறிப்பிட்ட அமைச்சர், போதிய வசதிகளற்ற தற்காலிகக் குடியிருப்புகளில் வாழும் மக்களின் நிலைமைகளை ஆராய்ந்து, அவர்களுக்குப் பொருத்தமான தீர்வுகளை வழங்குவதற்கான திட்டங்களைத் தயாரிக்குமாறும் அறிவுறுத்தியுள்ளார்.
மேலும், வெள்ளப் பாதிப்புகளைக் குறைப்பதற்கான முன்னெச்சரிக்கை நடவடிக்கைகளுடன், நீண்டகாலத் தீர்வுகளுக்கான முன்மொழிவுகளையும் தயாரிக்க வேண்டும் என அவர் வலியுறுத்தியுள்ளார்.
இதற்கமைய, பிரதேச செயலாளர்கள் தத்தமது பிரதேசங்களின் நிலைமைகளை விரிவாக ஆராய்ந்து, உரிய முன்மொழிவுகளைச் சமர்ப்பிக்க வேண்டும் என அமைச்சர் இராமலிங்கம் சந்திரசேகர் தெரிவித்துள்ளார்.
