யாழ்ப்பாணத்தில் வீடொன்றின் காணிக்குள் சாராய போத்தல்களைப் புதைத்து வைத்து விற்பனை செய்து வந்த நபர் ஒருவரை யாழ்ப்பாணப் பொலிஸார் கைது செய்துள்ளனர்.
பௌர்ணமி தினமான இன்றைய தினம் ஞாயிற்றுக்கிழமை, கொக்குவில் புகையிரத நிலையத்தை அண்மித்த பகுதியில் உள்ள வீடொன்றில் நபர் ஒருவர் மதுபானம் விற்பனை செய்வதாக யாழ்ப்பாண தலைமைப் பொலிஸ் நிலைய பொறுப்பதிகாரி பாலித செனவிரத்தினவிற்கு இரகசியத் தகவல் கிடைத்துள்ளது.
இந்தத் தகவலின் அடிப்படையில் பொலிஸார் குறித்த வீட்டிற்கு விரைந்து சோதனை நடவடிக்கையை முன்னெடுத்தனர்.
பொலிஸார் வீட்டில் சோதனை நடத்திய போது, வீட்டின் பின்புறமாக கிடங்கு வெட்டி, அதனுள் மதுபான போத்தல்களைப் புதைத்து வைத்திருந்தமை கண்டுபிடிக்கப்பட்டது.
மேலும், அவற்றை இலகுவாக எடுப்பதற்கு ஏதுவாகக் கிடங்கில் சிறு துளை விட்டு, அதனூடாக போத்தல்களை வெளியே எடுத்து அவர் விற்பனை செய்து வந்துள்ளார் என்பதும் தெரியவந்துள்ளது.
இதனைத் தொடர்ந்து குறித்த நபரை பொலிஸார் கைது செய்ததுடன், அவரிடமிருந்து 187.5 மில்லி லீட்டர் (கால் போத்தல்) கொள்ளளவு கொண்ட 45 மதுபான போத்தல்களையும் கைப்பற்றியுள்ளனர்.
கைது செய்யப்பட்ட நபரைப் பொலிஸ் நிலையத்தில் தடுத்து வைத்துப் பொலிஸார் மேலதிக விசாரணைகளை முன்னெடுத்து வருகின்றனர்.
