கொழும்பில் உள்ள மத்திய அஞ்சல் பரிமாற்றகத்தில், வெளிநாடுகளிலிருந்து அனுப்பப்பட்ட ஒன்பது அஞ்சல் பொட்டலங்களிலிருந்து 60 மில்லியன் ரூபாய்க்கும் அதிக பெறுமதியான போதைப்பொருட்கள் கைப்பற்றப்பட்டுள்ளன.
இலங்கை சுங்கத்துறையினரால் கைப்பற்றப்பட்ட போதைப்பொருட்களில் குஷ் கஞ்சா, ஹஷிஷ், எக்ஸ்டஸி மாத்திரைகள் மற்றும் கொக்கைன் ஆகியவை அடங்குகின்றன. இவற்றின் மொத்த பெறுமதி 60.265 மில்லியன் ரூபாய் என மதிப்பிடப்பட்டுள்ளது.
தாய்லாந்து, ஸ்பெயின், ஐக்கிய இராச்சியம் மற்றும் அமெரிக்கா ஆகிய நாடுகளிலிருந்து இந்தப் பொட்டலங்கள் அனுப்பப்பட்டுள்ளன.
சந்தேகத்திற்கிடமான அஞ்சல் பொட்டலங்கள் வழக்கமான சோதனைகளின்போது அடையாளம் காணப்பட்ட நிலையில், அவற்றைப் பெறுவதற்கு எவரும் முன்வராததால் பொலிஸ் போதைப்பொருள் தடுப்புப் பிரிவினரின் முன்னிலையில் சோதனையிடப்பட்டன.
இதன்போது, 4,934 கிராம் குஷ் கஞ்சா, 1,035 கிராம் ஹஷிஷ், 25 கிராம் எக்ஸ்டஸி மற்றும் 4 கிராம் கொக்கைன் ஆகியவை மீட்கப்பட்டுள்ளன.
இதனைத் தொடர்ந்து, கைப்பற்றப்பட்ட போதைப்பொருட்கள் மேலதிக விசாரணைகள் மற்றும் சட்ட நடவடிக்கைகளுக்காக பொலிஸ் போதைப்பொருள் தடுப்புப் பிரிவினரிடம் ஒப்படைக்கப்பட்டுள்ளதாக இலங்கை சுங்கத்துறை தெரிவித்துள்ளது.
