வடக்கில் அண்மையில் பெய்த மழையினால் கிணறுகள், குளங்கள், வாய்க்கால்கள் மற்றும் தாழ்வான பகுதிகளில் அதிகளவு நீர் தேங்கி நிற்பதால், ஆபத்தான நீர்நிலைகள் தொடர்பில் பொதுமக்கள் மிகுந்த அவதானத்துடன் இருக்குமாறு யாழ். போதனா வைத்தியசாலையின் பணிப்பாளர் வைத்தியர் த. சத்தியமூர்த்தி எச்சரித்துள்ளார்.
யாழ். போதனா வைத்தியசாலையின் சட்ட மருத்துவப் பிரிவில் பதிவாகியுள்ள தகவல்களின் அடிப்படையில், 2025 மற்றும் 2026 ஆம் ஆண்டுகளில் நீர்நிலைகளில் தவறுதலாக வீழ்ந்து இரு சிறுவர்கள் உள்ளிட்ட 15 பேர் உயிரிழந்துள்ளனர் என அவர் தெரிவித்துள்ளார்.
உயிரிழந்தவர்களில் 9 பேர் ஆண்கள், 6 பேர் பெண்கள் என்பதுடன், அவர்களின் வயது 6 முதல் 71 வரை காணப்படுகின்றது.
2025 இல் 8 உயிரிழப்புகளும், 2026 இல் 7 உயிரிழப்புகளும் பதிவாகியுள்ளன.
குறிப்பாக புங்குடுதீவு, காரைநகர் போன்ற பகுதிகளில் பாதுகாப்பற்ற திறந்த கிணறுகள் அதிகளவில் காணப்படுகின்றன.
மழைக்காலத்தில் அவை நீரால் நிரம்பும்போது ஆபத்தை எளிதில் அடையாளம் காண முடியாமல் போகலாம் என்பதால், பொறுப்புவாய்ந்த அதிகாரிகள் உடனடியாக பாதுகாப்பு வேலிகள், மூடிகள் மற்றும் எச்சரிக்கை அறிவிப்புகளைப் பொருத்த வேண்டும் என அவர் வலியுறுத்தியுள்ளார்.
ஏனைய பகுதிகளிலும் இத்தகைய ஆபத்தான நீர்நிலைகள் காணப்பட்டால், சமூக ஆர்வலர்களும் பொதுமக்களும் அதிகாரிகளின் கவனத்திற்கு கொண்டு செல்ல உதவ வேண்டும்.
மேலும், பெற்றோர்கள் தமது பிள்ளைகளை நீர்நிலைகளுக்கு அருகில் தனியாகச் செல்ல அனுமதிக்காமல் கண்காணிக்க வேண்டும் என்றும், மதுபோதையில் உள்ளவர்கள் நீர்நிலைகளுக்கு அருகில் செல்வதைத் தவிர்க்க வேண்டும் என்றும் வைத்தியசாலை பணிப்பாளர் கேட்டுக்கொண்டுள்ளார்.
