இங்கிரியவில் இலங்கை போக்குவரத்துச் சபைக்குச் சொந்தமான பேருந்து மீது கறுப்பு எண்ணெயை வீசியதுடன், அதன் சாரதி மற்றும் நடத்துநரைத் தாக்கிய குற்றச்சாட்டில் இருவர் கைது செய்யப்பட்டுள்ளனர்.
ஹொரணை சாலைக்கான கரந்தன – ஹொரணை வழித்தடத்தில் சேவையில் ஈடுபட்டிருந்த பேருந்து மீது, நேற்று (27) இரவு இங்கிரிய, கெட்டகரெல்ல பகுதியில் இந்தத் தாக்குதல் நடத்தப்பட்டதாகத் தெரிவிக்கப்படுகிறது.
முச்சக்கரவண்டியில் வந்த சந்தேகநபர்கள், பேருந்தை வழிமறித்து, சாரதி மீது கறுப்பு எண்ணெயை வீசியதுடன், சாரதி மற்றும் நடத்துநர் இருவரையும் தாக்கியதாகக் கூறப்படுகிறது.
இந்தச் சம்பவம் தொடர்பாக மேற்கொள்ளப்பட்ட விசாரணைகளின் அடிப்படையில், தனியார் பேருந்து உரிமையாளர் ஒருவரும் நடத்துநர் ஒருவரும் கைது செய்யப்பட்டுள்ளனர்.
சம்பவம் தொடர்பான மேலதிக விசாரணைகளை இங்கிரிய பொலிஸார் முன்னெடுத்து வருகின்றனர்.
