வவுனியா பம்பைமடுவில் அமைந்துள்ள வவுனியா பல்கலைக்கழகத்தின் பிரதான வாயிலுக்கு முன்பாக, பல்கலைக்கழக ஆசிரியர்கள் மற்றும் ஊழியர்கள் இணைந்து கவனயீர்ப்புப் போராட்டம் ஒன்றை முன்னெடுத்துள்ளனர்.
பல்கலைக்கழக ஆசிரியர் சங்கங்களின் சம்மேளனத்தின் கூட்டுத் தீர்மானத்திற்கு ஆதரவு தெரிவிக்கும் வகையிலேயே இந்தப் போராட்டம் இடம்பெற்றுள்ளது.
பல்கலைக்கழக ஆசிரியர்கள் மற்றும் ஊழியர்கள் மீது சுமத்தப்பட்டுள்ள அதிகரிக்கப்பட்ட வரிச்சுமையைக் குறைக்க வேண்டும், விசேட கொடுப்பனவுகள், பரீட்சை வினாத்தாள் திருத்துவதற்கான கொடுப்பனவுகள் மற்றும் மேலதிகப் பயணக் கொடுப்பனவுகள் தொடர்பான பிரச்சினைகளுக்குத் தீர்வு வழங்க வேண்டும் உள்ளிட்ட பல்வேறு கோரிக்கைகள் இதன்போது முன்வைக்கப்பட்டுள்ளன.
மேலும், பல்கலைக்கழக ஆசிரியர்களின் பிள்ளைகளுக்கான முதலாம் ஆண்டு அனுமதி தொடர்பான பிரச்சினைகளுக்கும் உரிய தீர்வு வழங்கப்பட வேண்டும் என வலியுறுத்தப்பட்டுள்ளது.
குறித்த கோரிக்கைகளை முன்வைத்து கொழும்பில் முன்னெடுக்கப்படும் ஆர்ப்பாட்டப் பேரணிக்கு வலுச்சேர்க்கும் வகையிலேயே வவுனியாவிலும் இந்தப் போராட்டம் நடத்தப்பட்டுள்ளமை குறிப்பிடத்தக்கது.
