பிரதான எதிர்க்கட்சியான கன்சர்வேட்டிவ் கட்சியின் தலைவர் பியர் பொய்லிவ்ரே (Pierre Poilievre) தனது நிழல் அமைச்சரவையின் முக்கியப் பொறுப்புகளில் அதிரடி மாற்றங்களை மேற்கொண்டுள்ளார்.
கட்சியின் நீண்டகால மற்றும் மூத்த நாடாளுமன்ற உறுப்பினர்களில் ஒருவரான மைக்கேல் சாங் (Michael Chong) புதிய நிதித்துறை விமர்சகராக (Finance Critic) நியமிக்கப்பட்டுள்ளார்.
மக்களின் அன்றாட வாழ்க்கைச் செலவு மற்றும் பொருளாதாரச் சுமை (Affordability) முதன்மைப் பிரச்சினையாக உருவெடுத்துள்ள சூழலில், எதிர்க்கட்சித் தலைவர் பியர் பொய்லிவ்ரே இந்த மாற்றங்களை அறிவித்துள்ளார்.
அதன்படி, வெலிங்டன்-ஹால்டன் ஹில்ஸ் வடக்கு (Wellington-Halton Hills North) தொகுதியின் நாடாளுமன்ற உறுப்பினரான மைக்கேல் சாங், தனது நீண்டகால வெளியுறவுத்துறை விமர்சகர் பொறுப்பிலிருந்து மாற்றப்பட்டு நிதித்துறை விமர்சகராக நியமிக்கப்பட்டுள்ளார்.
கடந்த 2004 ஆம் ஆண்டுமுதன்முதலாக நாடாளுமன்றத்திற்குத் தேர்ந்தெடுக்கப்பட்ட மைக்கேல் சாங், தற்போதைய லிபரல் அரசாங்கத்தின் பொருளாதாரத் தோல்விகளையும், நாட்டின் மந்தமான உற்பத்தித் திறனையும் கடுமையாகக் கேள்விக்குட்படுத்துவதே தனது முதன்மை நோக்கம் எனத் தெரிவித்துள்ளார்.
