கொம்பன், ‘விருமன்’ போன்ற கிராமத்து பின்னணி கொண்ட ஹிட் திரைப்படங்களை இயக்கிய இயக்குநர் முத்தையா இயக்கத்தில், நடிகர் அருண் விஜய் முதன்முறையாகக் கைகோர்க்கும் அவரது 38-வது திரைப்படத்தின் தலைப்பு மற்றும் முதல் தோற்றம் (First Look) வரும் ஆகஸ்ட் 12-ஆம் தேதி அதிகாரப்பூர்வமாக வெளியாக உள்ளது.
வித்தியாசமான கதைக்களங்களைத் தேர்ந்தெடுத்து நடித்து வரும் நடிகர் அருண் விஜய் மற்றும் கிராமத்து செண்டிமெண்ட் பிளஸ் ஆக்ஷன் காட்சிகளுக்குப் பெயர் பெற்ற முத்தையா கூட்டணியில் உருவாகும் முதல் படம் என்பதால், திரை உலகினரிடமும் ரசிகர்களிடையேயும் இதன் மீது பெரும் எதிர்பார்ப்பு நிலவி வருகிறது.
இயக்குநர் முத்தையாவின் வழக்கமான அதிரடி சண்டைக்களப் பின்னணியில் உருவாகும் இக்கதைக்காகவும் சண்டைக் காட்சிகளுக்காகவும் நடிகர் அருண் விஜய் தனது உடலமைப்பை மிகவும் கட்டுமஸ்தான, மிரட்டலான தோற்றத்திற்கு மாற்றியுள்ளார்.
இத்திரைப்படத்தில் அருண் விஜய்க்கு ஜோடியாக நடிகை மிர்ணா நடிக்கிறார். ‘நேதாஜி ப்ரொடக்ஷன்ஸ்’ சார்பில் சண்முகவேல் பாண்டியன் தயாரிக்கும் இப்படத்திற்கு பிரபல இசையமைப்பாளர் ஜிப்ரான் இசையமைக்கிறார்.
தற்போது இத்திரைப்படத்தின் மிக முக்கியமான ஆக்ஷன் காட்சிகளுக்கான படப்பிடிப்பு தென்காசி மற்றும் திருநெல்வேலி மாவட்டத்தைச் சுற்றியுள்ள கிராமத்துப் பகுதிகளில் விறுவிறுப்பாக நடைபெற்று வருகிறது. படப்பிடிப்பு இறுதி கட்டத்தை எட்டி வரும் சூழலில், ரசிகர்களின் நீண்ட நாள் ஆவலைத் பூர்த்தி செய்யும் வகையில் இப்படத்தின் தலைப்பு மற்றும் ஃபர்ஸ்ட் லுக் போஸ்டர் ஆகஸ்ட் 12 அன்று வெளியாகும் எனப் படக்குழுவினர் அதிகாரப்பூர்வமாக அறிவித்துள்ளனர்.
