தமிழ் திரையுலகின் முன்னணி நடிகரான ‘மக்கள் செல்வன்’ விஜய் சேதுபதி நடிப்பில் பெரும் எதிர்பார்ப்பை ஏற்படுத்தியுள்ள புதிய திரைப்படம் ‘பத்தா’. பிரபல இயக்குநர் அட்லீயின் ‘A for Apple Studios’, ‘Star Studio18’ மற்றும் ‘Cine 1 Studios Production’ ஆகிய முன்னணி நிறுவனங்கள் இணைந்து தயாரித்துள்ள இத்திரைப்படம், வரும் அக்டோபர் 1-ஆம் தேதி உலகம் முழுவதும் திரையரங்குகளில் வெளியாகும் என அதிகாரப்பூர்வமாக அறிவிக்கப்பட்டுள்ளது.
ஏற்கனவே “நடுவுல கொஞ்சம் பக்கத்த காணோம்” மற்றும் “சீதக்காதி” ஆகிய படங்களைக் கொடுத்த இயக்குநர் பாலாஜி தரணிதரன் மற்றும் விஜய் சேதுபதி கூட்டணி, மூன்றாவது முறையாக இப்படத்தின் மூலம் மீண்டும் இணைந்துள்ளதால் ரசிகர்கள் மத்தியில் எதிர்பார்ப்பு அதிகரித்துள்ளது.
மேலும், ‘ஜவான்’ திரைப்படத்தின் பிரம்மாண்ட வெற்றிக்குப் பிறகு அட்லீ – விஜய் சேதுபதி கூட்டணி மீண்டும் ஒரு தமிழ் திரைப்படத்தின் மூலம் கைகோர்த்திருப்பது திரைத்துறையில் பெரும் கவனத்தைப் பெற்றுள்ளது.
இப்படத்தில் ‘ஜெய் பீம்’ புகழ் லிஜோமோல் ஜோஸ் கதாநாயகியாக நடிக்க, இளம் இசையமைப்பாளர் சாய் அப்யங்கர் இசையமைத்துள்ளார். செல்வகுமார் SK ஒளிப்பதிவையும், ஆர். கலைவாணன் படத்தொகுப்பையும் மேற்கொண்டுள்ளனர். முராத் கெதானி, பிரியா அட்லீ, அலோக் ஜெயின் மற்றும் அஜித் அந்தாரே ஆகியோர் இணைந்து தயாரித்துள்ள ‘பத்தா’ திரைப்படம், ரசிகர்களுக்கு ஒரு வித்தியாசமான திரையரங்க அனுபவத்தைத் தரும் என எதிர்பார்க்கப்படுகிறது.
