காற்றில் கரைந்த தேனிசைத் தென்றல்!

தமிழ் திரையிசை உலகில் தனது கானம் மூலம் ரசிகர்களை சுண்டி இழுத்தவர் இசையமைப்பாளர் தேனிசைத் தென்றல் தேவா. இவரது மறைவு திரையுலகினர் மட்டுமன்றி இசை ரசிகர்கள் மத்தியில் பெரும் அதிர்ச்சியை ஏற்படுத்தியுள்ளது.

தேனி மாவட்டம் பெரும்பாறையில் எம்.சி. செல்லையா – மரிய தாஸ் தம்பதிக்கு மகனாக கடந்த 1950ஆம் ஆண்டு நவம்பர் 20ஆம் தேதி பிறந்தவர் தேவா. இவரது இயற்பெயர் தேவநேசன் செல்லையா ஆகும். சாதாரண நடுத்தரக் குடும்பத்தில் பிறந்து, சிறு வயதிலிருந்தே இசை மீது ஆர்வம் கொண்டிருந்த இவர், திருச்சி செயின்ட் ஜோசப் கல்லூரியில் கல்வி பயின்றார். இவருக்கு மனைவியும் நான்கு குழந்தைகளும் உள்ள நிலையில், இவரது மகன் ஸ்ரீகாந்த் தேவாவும் பிரபல இசையமைப்பாளராக உள்ளார்.

இளையராஜாவின் அண்ணன் கங்கை அமரனிடம் இசை பயின்ற தேவா, சினிமாவில் வாய்ப்புப் பெற பல ஆண்டுகள் போராடினார்.

சுமார் 20 ஆண்டுகள் பின்னணிப் பாடகர்களுக்கு மேடைகளில் பாடிக்கொண்டும், பல இசையமைப்பாளர்களிடம் உதவியாளராகவும் பணியாற்றிய அவர், 1988இல் வெளியான ‘மனசுக்கேத்த மகராசா’ படத்தின் மூலம் இசையமைப்பாளராக அறிமுகமானார்.

அதனைத் தொடர்ந்து 1989இல் வெளிவந்த ‘வைகாசி பொறந்தாச்சு’ படம் அவருக்கு மிகப்பெரிய திருப்புமுனையாக அமைந்தது.

90-களில் தமிழ் சினிமாவின் முன்னணி இசையமைப்பாளராகத் திகழ்ந்த தேவா, ‘அண்ணாமலை’, ‘பாட்ஷா’, ‘காதல் கோட்டை’, ‘ஆசை’, ‘பவித்ரா’ உள்ளிட்ட பல படங்களுக்கு ஹிட் பாடல்களைக் கொடுத்துள்ளார்.

ரஜினி, கமல், விஜய், அஜித் என அனைத்து முன்னணி நடிகர்களின் படங்களுக்கும் இசையமைத்துள்ளார். குறிப்பாக, 1990 முதல் 1999 வரையிலான பத்தாண்டுகளில் 200க்கும் மேற்பட்ட படங்களுக்கு இசையமைத்துள்ள அவர், அதிகபட்சமாக 1995ஆம் ஆண்டில் மட்டும் 36 படங்களுக்கு இசையமைத்து சாதனை படைத்துள்ளார்.

தமிழ், தெலுங்கு, மலையாளம் மற்றும் கன்னடம் என இதுவரை 400 முதல் 430 படங்கள் வரை அவர் இசையமைத்துள்ளார்.

கிராமிய மண் வாசனை, குத்துப்பாட்டு மற்றும் கானா பாட்டு ஆகியவற்றின் மூலம் மக்களின் நாடித்துடிப்பை அறிந்து இசையமைத்ததால் அவர் ‘தேனிசைத் தென்றல்’ மற்றும் ‘கானா கிங்’ என அழைக்கப்படுகிறார்.

மேலும், ரஜினி படங்களின் டைட்டில் கார்டுக்கான பின்னணி இசையில் இவரது பங்கு மிக முக்கியமானதாகும்.

கலைமாமணி விருது (1996), தமிழ்நாடு மாநில திரைப்பட விருதுகள் மற்றும் பல்வேறு வாழ்நாள் சாதனையாளர் விருதுகளை அவர் பெற்றுள்ளார்.

விருதுகளைத் தாண்டி மக்களின் மனதில் நீங்கா இடம் பிடித்த தேவா, 90-களில் வருடத்திற்கு 30 முதல் 40 படங்களுக்கு இசையமைத்த ஒரே இசையமைப்பாளர் என்ற சாதனையைச் சொந்தமாகக் கொண்டுள்ளார்.