இந்தியாவின் பீகார் மாநிலம் சவான் மாவட்டத்தில் உள்ள பட்டாசுத் தொழிற்சாலையில் ஏற்பட்ட பயங்கர வெடிவிபத்தில் ஐந்து பேர் உயிரிழந்துள்ளனர்.
சவான் மாவட்டத்தின் ஜாமோ காவல் நிலையப் பிரிவுக்குட்பட்ட அலம்பூர் கிராமத்தில் முகமது அமிருதீன் மியான் என்பவருக்குச் சொந்தமான வீடொன்றில் பட்டாசு தயாரிக்கும் பணி மேற்கொள்ளப்பட்டு வந்தபோதே இச்சம்பவம் இடம்பெற்றுள்ளது.
வெடிப்பொருட்களின் தாக்கம் காரணமாகக் கட்டிடம் பலத்த சேதமடைந்துள்ளதுடன், கட்டிடத்தின் முன்பகுதி இடிந்து விழுந்து இடிபாடுகள் வீதியெங்கும் பரவிக் கிடந்தன.
விபத்தைத் தொடர்ந்து அருகில் சேமித்து வைக்கப்பட்டிருந்த பட்டாசுகள் ஒன்றன்பின் ஒன்றாக வெடித்துச் சிதறியதால் அப்பகுதியில் கடுமையான பதற்றம் ஏற்பட்டதுடன், மீட்புப் பணிகளிலும் தாமதம் ஏற்பட்டது.
சம்பவ இடத்திற்கு விரைந்த மாவட்ட ஆட்சியர் விஜய் பிரகாஷ் மீனா மற்றும் மாவட்ட காவல் கண்காணிப்பாளர் பாரத் சோனி தலைமையிலான காவல்துறையினர் மீட்பு நடவடிக்கைகளை முடுக்கிவிட்டனர்.
மருத்துவக் குழுவினரின் பரிசோதனைக்குப் பின்னரே ஐந்து பேர் உயிரிழந்திருப்பது உத்தியோகபூர்வமாக உறுதிப்படுத்தப்பட்டுள்ளதாக எஸ்பி பாரத் சோனி தெரிவித்தார்.
இதேவேளை, உரிய பாதுகாப்பு ஏற்பாடுகளை மேற்கொள்ளத் தவறியதாகக் கூறப்படும் குற்றச்சாட்டின் பேரில் அப்பகுதி காவல் நிலைய பொறுப்பதிகாரி உட்பட இரண்டு காவல்துறை அதிகாரிகள் பணியிடை நீக்கம் செய்யப்பட்டுள்ளனர்.
தடயவியல் நிபுணர் குழுவினர் சம்பவ இடத்திலிருந்து மாதிரிகளைச் சேகரித்து வருவதுடன், வெடிவிபத்துக்கான முழுமையான காரணம் குறித்துக் காவல்துறையினர் தொடர் விசாரணைகளை மேற்கொண்டு வருகின்றனர்.
