வின்னிபெக் நகரில், மிதிவண்டிப் பாதைகள் மற்றும் பாதசாரிகளுக்கான உள்கட்டமைப்பை மேம்படுத்துவதற்கான நிதி ஒதுக்கீடு, மேயர் தேர்தலில் முக்கிய விவாதமாகியுள்ளது.
நகரின் 2026ஆம் ஆண்டு வரவுசெலவுத் திட்டத்தின்படி, அடுத்த ஆறு ஆண்டுகளில் சுறுசுறுப்பான போக்குவரத்து வசதிகளுக்காக 112.8 மில்லியன் டொலர்கள் ஒதுக்கப்படவுள்ளன. இதில், மிதிவண்டிப் பாதைகள் மற்றும் பாதசாரி வசதிகளுக்காக 60 மில்லியன் டொலர்கள் செலவிடத் திட்டமிடப்பட்டுள்ளது.
எனினும், சில மேயர் வேட்பாளர்கள் இந்த நிதியைக் குறைக்கவோ, அதன் ஒரு பகுதியை வீடற்றோருக்கான உதவிகள் மற்றும் சமூக உள்கட்டமைப்புகளுக்குத் திருப்பவோ விரும்புகின்றனர். மற்ற வேட்பாளர்கள் தற்போதைய திட்டத்தைத் தொடரவும், பாதுகாப்பான மிதிவண்டிப் போக்குவரத்தை மேம்படுத்தவும் ஆதரவு தெரிவித்துள்ளனர்.
இதற்கிடையில், நகரில் மிதிவண்டிப் பாதைகள் மேம்பட்டுள்ள போதிலும், அவற்றை இணைக்கும் பாதைகள் இன்னும் போதுமானதாக இல்லை என மிதிவண்டி ஆர்வலர்கள் சுட்டிக்காட்டியுள்ளனர்.
புதிய நகரசபை அமைந்த பின்னர், மிதிவண்டிப் பாதைகளுக்கான நிதி ஒதுக்கீடு மற்றும் நகரின் போக்குவரத்துத் திட்டங்களில் எத்தகைய மாற்றங்கள் ஏற்படும் என்பது கவனத்தைப் பெற்றுள்ளது.
