நாட்டில் சீரற்ற வானிலை நிலவியமையால் பல்வேறு இடங்களில் வெள்ள நிலைமை ஏட்பட்டிருந்தது.
இந்நிலையில் கொழும்பில் வெள்ளப்பெருக்கு ஏற்பட்டுள்ளதாகச் செயற்கை நுண்ணறிவால் (AI) உருவாக்கப்பட்ட போலிக் காணொளிகளைத் தயாரித்து சமூக ஊடகங்களில் பரப்புவோருக்கு எதிராகச் சட்ட நடவடிக்கை எடுக்கப்படும் என கொழும்பு மேயர் எச்சரித்துள்ளார்.
சமீபத்தில் பெய்த கனமழையைத் தொடர்ந்து, கொழும்பில் உள்ள ஒன் காலி ஃபேஸ் வணிக வளாகம் வெள்ளத்தில் மூழ்கியுள்ளதாகக் காட்டும் காணொளிகள் பேஸ்புக் மற்றும் டிக்டொக் உள்ளிட்ட சமூக ஊடகங்களில் பரவியுள்ளன.
எனினும், இந்தக் காணொளிகள் செயற்கை நுண்ணறிவைப் பயன்படுத்தி உருவாக்கப்பட்டவை அல்லது திருத்தப்பட்டவை என்பதை ஃபேக்ட் கிரெசெண்டோ ஸ்ரீலங்கா உண்மை சரிபார்ப்பு அமைப்பு உறுதிப்படுத்தியுள்ளது.
காணொளியில் சிதைக்கப்பட்ட முகங்கள், இயற்கைக்கு மாறான நீரின் அசைவுகள் மற்றும் தவறான எழுத்துருக்கள் காணப்பட்டதாகவும், கூகுளின் SynthID கண்டறியும் கருவியும் செயற்கை நுண்ணறிவால் உருவாக்கப்பட்ட உள்ளடக்கத்திற்கான ஆதாரங்களைக் கண்டறிந்ததாகவும் தெரிவிக்கப்பட்டுள்ளது.
மேலும், வணிக வளாகத்திலுள்ள கடை ஊழியர்களிடம் மேற்கொள்ளப்பட்ட விசாரணையில், வெள்ளநீர் கட்டடத்திற்குள் நுழையவில்லை என்பது உறுதிப்படுத்தப்பட்டுள்ளது. வாகன நிறுத்துமிடத்தில் சிறிதளவு நீர் தேங்கியிருந்த போதிலும், காணொளியில் காட்டப்பட்டதைப் போன்ற நிலைமை ஏற்படவில்லை எனவும் தெரிவிக்கப்பட்டுள்ளது.
கொழும்பின் சில பகுதிகளில் உண்மையான வெள்ளப்பெருக்கு ஏற்பட்டிருந்தாலும், ஒன் காலி ஃபேஸ் வணிக வளாகம் வெள்ளத்தில் மூழ்கியதாகப் பரப்பப்படும் தகவல் போலியானது என உண்மை சரிபார்ப்பு அமைப்பு தெரிவித்துள்ளது.
இதற்கிடையில், தவறான தகவல்களைப் பரப்பி பொதுமக்களிடையே அச்சத்தையும் குழப்பத்தையும் ஏற்படுத்துவோருக்கு எதிராகக் கடுமையான நடவடிக்கை எடுக்கப்படும் என மேயர் எச்சரித்துள்ளார்.
