கியூபெக் மாகாணத்தின் தற்போதைய முதலமைச்சரும் CAQ கட்சியின் தலைவருமான கிறிஸ்டின் பிரெஷெட் (Christine Fréchette), நடைபெறவிருக்கும் மாகாணப் பொதுத்தேர்தலில் தனது சொந்த ஊரான ‘துவா-ரிவியேர்’ (Trois-Rivières) தொகுதியில் போட்டியிடுவதாக அதிகாரப்பூர்வமாக அறிவித்துள்ளார்.
கியூபெக் மாகாணத்தின் தேர்தல் முடிவுகளைத் தீர்மானிக்கும் மிக முக்கியக் குறிகாட்டித் தொகுதியாக (Bellwether riding) கருதப்படும் இந்த இடத்தினை, தாம் போட்டி இடுவதற்காக பிரெஷெட் தேர்ந்தெடுத்திருப்பது, கியூபெக் அரசியல் வட்டாரத்தில் பெரும் பரபரப்பை ஏற்படுத்தியுள்ளது. தாம் தற்போது பிரதிநிதித்துவப்படுத்தும் மொண்ட்ரியலுக்கு தெற்கே உள்ள சங்குயினெட் (Sanguinet) தொகுதியை விடுத்து, தனது சொந்த ஊரான துவா-ரிவியேர் தொகுதியில் போட்டியிடப் போவதாக இன்று காலை நடைபெற்ற பொது நிகழ்வில் அவர் உறுதிப்படுத்தினார்.
துவா-ரிவியேர் தொகுதியின் தற்போதைய சட்டமன்ற உறுப்பினரும் (MNA), மாகாண தொழிலாளர் நலத்துறை அமைச்சருமான Jean Boulet தனது அரசியல் ஓய்வை அண்மையில் அறிவித்திருந்தார். இந்த நிலையில், துவா-ரிவியேரில் நடைபெற்ற செய்தியாளர் சந்திப்பில் உணர்ச்சிப்பூர்வமாகப் பேசிய கிறிஸ்டின் பிரெஷெட், தமது தொகுதி மாற்றத்திற்கான காரணத்தை விளக்கியுள்ளமை குறிப்பிடத்தக்கது.
