மொன்றியலில் இயங்கும் முன்னணி இணையவழி உணவுத் தொகுப்பு (Meal Kit) விநியோக நிறுவனமான ‘குட்ஃபுட் மார்க்கெட் கார்ப்’ (Goodfood Market
Corp), கடுமையான நிதி நெருக்கடி மற்றும் பல மில்லியன் டொலர் கடன் காரணமாகக் கடன் மறுசீரமைப்பு நடவடிக்கைகளுக்காகக் கியூபெக் மேல்
நீதிமன்றத்திடம் (Superior Court of Quebec) கடன் பாதுகாப்புக் கோரியுள்ளது.
நிறுவனத்தின் கடன்களை மறுசீரமைக்கவும், புதிய முதலீட்டாளர்களைக் கண்டறியவும் அல்லது நிறுவனத்தை முழுமையாக விற்பனை செய்யவும்
வழியமைக்கும் வகையில், கியூபெக் நீதிமன்றம், தற்போது அந்த நிறுவனத்திற்குத் தற்காலிகக் கடன் பாதுகாப்பை வழங்கி உத்தரவிட்டுள்ளது.
நிறுவனங்களின் கடன் வழங்குநர்கள் ஏற்பாட்டுச் சட்டத்தின் (CCAA) கீழ், இந்த உத்தரவு பிறப்பிக்கப்பட்டுள்ளது. கடன் பாதுகாப்பு நடவடிக்கைகளின் கீழ் நிறுவனம் இயங்கினாலும், நாடு முழுவதும் வாடிக்கையாளர்களுக்கான உணவு விநியோகச் சேவைகள் வழக்கம்போல் தடையின்றித் தொடரும் என ‘குட்ஃபுட் மார்க்கெட் கார்ப்’ (Goodfood Market Corp) நிறுவனத்தின் நிர்வாகம் அறிவித்துள்ளது.
மொன்றியல் மட்டுமல்லாமல் கால்கரி மற்றும் மிசிசாகா ஆகிய பகுதிகளிலும் செயற்பட்டு வரும் இந்நிறுவனத்தில், சுமார் 230 ஊழியர்கள்
பணியாற்றுகின்றனர். தற்போதைய நீதிமன்ற நடவடிக்கைகளால் உடனடியாக எவரும் வேலை இழக்க மாட்டார்கள் எனக் கூறப்பட்ட போதிலும், மறுசீரமைப்பின் ஒரு பகுதியாக எதிர்காலத்தில் இலக்கு வைக்கப்பட்ட பணியாளர் குறைப்புகள் (targeted cuts) இடம்பெறக்கூடும் என எச்சரிக்கப்பட்டுள்ளது.
கடன் பாதுகாப்பு மனுத் தாக்கல் செய்யப்படுவதற்குச் சில நாட்களுக்கு முன்னர், நிறுவனத்தின் தலைமை நிறைவேற்று அதிகாரி (CEO) செலிம் ஏ. பாசூல் (Selim A. Bassoul) தனது பதவியிலிருந்து விலகியிருந்தார். அதனைத் தொடர்ந்து, நிறுவனத்தின் தலைவராகவும் முதன்மை செயல்பாட்டு அதிகாரியாகவும் இருந்த நஜீப் மாலூஃப் (Najib Maalouf) புதிய தலைமை நிறைவேற்று அதிகாரியாக நியமிக்கப்பட்டுள்ளமை குறிப்பிடத்தக்கது.
