மத்திய ஆபிரிக்காவில் தீவிரமாகப் பரவி வரும் கொடிய எபோலா வைரஸைக் கட்டுப்படுத்தும் நடவடிக்கைகளுக்காக அமெரிக்க வெளியுறவுத் துறை மேலதிகமாக 267 மில்லியன் டொலர்களை வழங்க உறுதியளித்துள்ளது.
ஐக்கிய நாடுகள் பொதுச் சபைக் கூட்டத்தின் பக்கவாட்டில் இடம்பெற்ற நிகழ்வொன்றில் அமெரிக்க வெளியுறவுத் துறையின் உயர் அதிகாரிகள் இந்நிதியுதவி தொடர்பான அறிவிப்பை வெளியிட்டனர்.
பிரதானமாக காங்கோ ஜனநாயகக் குடியரசில் பரவி வரும் இந்த நோயைக் கட்டுப்படுத்த 2 பில்லியன் டொலர் நிதியைத் திரட்டும் இலக்கை அடையும் நோக்கில், ஏனைய நாடுகளும் புதிய நிதியுதவிகளை வழங்கும் என அவர்கள் நம்பிக்கை வெளியிட்டுள்ளனர்.
கடந்த மே மாதம் கண்டறியப்பட்ட இந்த எபோலா பரவலானது, வரலாற்று ரீதியாகப் பதிவான இரண்டாவது மிக மோசமான உயிரிழப்புகளை ஏற்படுத்திய பரவலாகக் கருதப்படுகிறது.
இதற்கு முன்னர் 2014 முதல் 2016 வரை மேற்கு ஆபிரிக்காவில் ஏற்பட்ட பரவலே முதலாவது இடத்தில் உள்ளது.
புதிதாக அறிவிக்கப்பட்டுள்ள இந்த உதவியையும் சேர்த்து, டிரம்ப் நிர்வாகம் எபோலா பரவலை எதிர்கொள்ள இதுவரை மொத்தம் 886 மில்லியன் டொலர்களை வழங்க உறுதியளித்துள்ளது.
இதில் அமெரிக்க சுகாதார மற்றும் மனித சேவைகள் திணைக்களம் வழங்கிய 107 மில்லியன் டொலர்களும் அடங்கும்.
இந்த நிதியுதவியானது நோய்ப் பரவல் ஆரம்பமான இடத்திலேயே அதனைக் கட்டுப்படுத்த உதவும் என அதிகாரி ஒருவர் தெரிவித்துள்ளார்.
சிகிச்சை மையங்களைக் கட்டுதல், பரிசோதனை வசதிகளை ஏற்படுத்துதல் மற்றும் களத்தில் பணியாற்றும் சுகாதாரப் பணியாளர்களுக்கான மருத்துவத் தடுப்பு நடவடிக்கைகளை வழங்குதல் போன்ற பணிகளுக்கு இந்நிதி பயன்படுத்தப்படவுள்ளது.
