பங்களாதேஷ் உலகிலேயே மிக மோசமான தட்டம்மை (Measles) நோய் பரவலை எதிர்கொண்டு வருகிறது.
கடந்த மார்ச் மாத பாதியிலிருந்து அக்டோபர் 9 வரையிலான காலத்தில் 202,000 சந்தேகத்திற்குரிய தட்டம்மை நோயாளர்கள் பதிவாகியுள்ளதாக உலக சுகாதார அமைப்பு (WHO) தெரிவித்துள்ளது.
இதில் 22,000 நோயாளர்கள் ஆய்வகப் பரிசோதனை மூலம் உறுதி செய்யப்பட்டுள்ளனர்.
இந்த அதிவேகமாகப் பரவும் நோயினால் இதுவரை 1,147 பேர் உயிரிழந்துள்ளதுடன், இதில் 94 சதவீதமானோர் ஐந்து வயதுக்குட்பட்ட குழந்தைகள் என உலக சுகாதார அமைப்பு குறிப்பிட்டுள்ளது.
2025ஆம் ஆண்டில் வழக்கமான தடுப்பூசி செலுத்தும் திட்டம் பலவீனமடைந்ததே இந்த நோய் பரவலுக்கு முக்கிய காரணமாகும்.
நோய்ப் பரவலைத் தடுக்க 95 சதவீதத் தடுப்பூசி பாதுகாப்பு தேவைப்படும் நிலையில், பங்களாதேஷில் முதற்கட்டத் தடுப்பூசி அளிப்பு 90 சதவீதமாகவும், இரண்டாம்கட்டத் தடுப்பூசி அளிப்பு 86 சதவீதமாகவும் சரிந்துள்ளது.
தரவுகளின் குறைபாடுகள், தயாரிப்புப் பணிகளில் ஏற்பட்ட குறைபாடுகள் மற்றும் விழிப்புணர்வு இன்மை போன்றவை இந்த நெருக்கடியை மேலும் தீவிரப்படுத்தியுள்ளன.
குறிப்பாக, நாட்டின் வடகிழக்கு பகுதியான சில்ஹெட் (Sylhet) பகுதி கடுமையாகப் பாதிக்கப்பட்டுள்ளது.
மேலும், செப்டம்பர் மாதத்தில் நாள் ஒன்றுக்கு சராசரியாக 1,198 புதிய தட்டம்மை வழக்குகள் பதிவாகியுள்ளன. பாதிக்கப்பட்டவர்களை இலக்கு வைத்துப் புதிய தடுப்பூசி முகாம்களை அரசு முன்னெடுத்து வருகின்ற போதிலும், போதிய சுகாதார ஊழியர்கள் இல்லாமை பெரும் சவாலாக உருவெடுத்துள்ளது.
தடுப்பூசி செலுத்துவதன் மூலம் நோய்களைத் தடுப்பதே அவசரகால நடவடிக்கைகளை விடப் பாதுகாப்பானது மற்றும் மலிவானது என உலக சுகாதார அமைப்பின் தடுப்பூசி ஆலோசகர் மார்க் ஜிட் எச்சரித்துள்ளார்.
