மட்டக்களப்பில் மயக்க மருந்து கொடுத்து தங்க நகைகள் கொள்ளை

மட்டக்களப்பில் மயக்க மருந்து கொடுத்து தங்க ஆபரணங்களைக் கொள்ளையிட்டு வந்ததாகக் கூறப்படும் கணவன், மனைவியின் செயலால் பாதிக்கப்பட்ட 65 வயதுடைய பெண் ஒருவர் உயிரிழந்துள்ளதாக உறவினர்கள் குற்றஞ்சாட்டியுள்ளனர்.

கல்லாறு பகுதியைச் சேர்ந்த கணபதிப்பிள்ளை விஜயலட்சுமி என்பவரே இவ்வாறு உயிரிழந்துள்ளார்.

கடந்த பெப்ரவரி மாதம் 4ஆம் திகதி மட்டக்களப்பு பிரதான பேருந்து நிலையத்தில் பேருந்துக்காகக் காத்திருந்த அவரை மோட்டார் சைக்கிளில் வந்த கணவன், மனைவி இருவரும் அணுகியுள்ளனர்.

அவருடன் பேச்சுக்கொடுத்து, பாதுகாப்புக் காரணங்களைக் கூறி தங்க நகைகளைக் கழற்றிப் கைப்பையில் வைக்குமாறு அறிவுறுத்தியுள்ளனர்.

இதன்போது, மயக்கத்தை ஏற்படுத்தும் மருந்து கலந்த பானமொன்றை அவருக்கு வழங்கியதாகக் கூறப்படுகிறது. அதனை அருந்திய சிறிது நேரத்தில் அவர் மயக்கமடைந்ததைத் தொடர்ந்து, சுமார் 7 பவுண் தங்க ஆபரணங்களைத் திருடிக்கொண்டு சந்தேகநபர்கள் தப்பிச் சென்றுள்ளனர்.

பின்னர் மயக்கமடைந்த நிலையில் வைத்தியசாலையில் அனுமதிக்கப்பட்ட அவருக்கு உடல்நலக் குறைவு ஏற்பட்டதுடன், சிறுநீரகப் பாதிப்பும் ஏற்பட்டதாக உறவினர்கள் தெரிவிக்கின்றனர்.

மட்டக்களப்பு போதனா வைத்தியசாலையில் சிகிச்சை பெற்று வந்த அவர், கடந்த 29ஆம் திகதி சிகிச்சை பலனின்றி உயிரிழந்துள்ளார்.

இதேவேளை, கடந்த மார்ச் மாதம் கொக்கட்டிச்சோலைப் பகுதியில் இடம்பெற்ற இளம் தாய் மற்றும் குழந்தை தொடர்பான சம்பவத்தில் கைது செய்யப்பட்ட கணவன், மனைவியே இந்தக் கொள்ளைச் சம்பவத்துடனும் தொடர்புடையவர்கள் எனத் தெரிவிக்கப்படுகிறது.

எனினும், மயக்க மருந்து காரணமாகவே உயிரிழப்பு ஏற்பட்டதாக உறவினர்கள் முன்வைக்கும் குற்றச்சாட்டு மருத்துவ மற்றும் பொலிஸ் விசாரணைகள் மூலம் உறுதிப்படுத்தப்பட வேண்டியுள்ளது.

இச்சம்பவம் தொடர்பான மேலதிக விசாரணைகளை களுவாஞ்சிக்குடி பொலிஸார் முன்னெடுத்து வருகின்றனர்.