மட்டக்களப்பு அம்பிளாந்துறை பிரதேசத்தில் வீடொன்றில் சட்டவிரோதமாகத் தங்கியிருந்த மலேசியப் பிரஜையான பெண் ஒருவரை நேற்று புதன்கிழமை (18.11.2026) இரவு 8.30 மணியளவில் கைது செய்துள்ளதாக கொக்கட்டிச்சோலை பொலிஸார் தெரிவித்தனர்.
கொக்கட்டிச்சோலை பொலிஸ் பிரிவிலுள்ள அம்பிளாந்துறை பிள்ளையார் கோவில் வீதியில் உள்ள வீடொன்றில் மலேசிய நாட்டுப் பெண் ஒருவர் சட்டவிரோதமாகத் தங்கியிருப்பதாக பொலிஸ் அவசர தொலைபேசி அழைப்பான 119 என்ற இலக்கத்திற்குத் தகவல் கிடைத்துள்ளது.
இதனையடுத்து நேற்று இரவு குறித்த வீட்டைப் பொலிஸார் முற்றுகையிட்டனர்.
கடந்த 10.05.2026 அன்று மலேசியாவிலிருந்து சுற்றுலா விசாவில் இலங்கைக்கு வந்த குறித்த பெண், அப்பிரதேசத்திலுள்ள தமது நண்பர்கள் வீட்டில் தங்கியிருந்த நிலையில் தவறி விழுந்து தனது வலது காலை முறித்துக்கொண்டுள்ளார்.
அதற்கான மருத்துவ சிகிச்சையைப் பெற்றுவந்த நிலையில், அவரது விசா காலம் கடந்த 08.09.2026 அன்று முடிவடைந்துள்ளது.
உடல் நலக்குறைவு காரணமாகச் சரியான காலத்தில் மீண்டும் நாட்டுக்குத் திரும்ப முடியாத நிலையில், விசா காலம் முடிவடைந்ததை அவர் கவனத்தில் கொள்ளாமல் இருந்துள்ளார்.
இதனையறிந்த சிலர் 119 என்ற அவசர இலக்கத்திற்குத் தகவல் அளித்துள்ளமை ஆரம்பக்கட்ட விசாரணையில் தெரியவந்துள்ளது.
இதனையடுத்து குறித்த பெண்ணைக் கைது செய்த பொலிஸார், அவரை நீதிமன்றில் ஆஜர்படுத்துவதற்கான நடவடிக்கைகளை முன்னெடுத்து வருவதாகத் தெரிவித்துள்ளனர்.











