மூத்த தமிழ் தேசிய அரசியல்வாதியும், வல்வெட்டித்துறை நகரசபைத் தவிசாளருமான எம்.கே. சிவாஜிலிங்கத்தின் புகழுடல் இன்று திங்கட்கிழமை ஊறணி இந்து மயானத்தில் தகனம் செய்யப்பட்டது.
69 வயதில் காலமான அவரது பூதவுடலுக்கு வல்வெட்டித்துறையில் நூற்றுக்கணக்கான மக்கள், அரசியல் தலைவர்கள் மற்றும் நாடாளுமன்ற உறுப்பினர்கள் நேரில் அஞ்சலி செலுத்தினர். இந்திய மக்களவை உறுப்பினர் தொல். திருமாவளவன், கஜேந்திரகுமார் பொன்னம்பலம், செல்வம் அடைக்கலநாதன், சிவஞானம் சிறிதரன், ஜீவன் தொண்டமான் உள்ளிட்ட அரசியல் பிரமுகர்களும் இறுதி நிகழ்வில் கலந்துகொண்டனர்.
அவரது மறைவையொட்டி வல்வெட்டித்துறை வர்த்தக நிலையங்கள் மூடப்பட்டதுடன், நகரெங்கும் கறுப்புக் கொடிகள் பறக்கவிடப்பட்டன. நகரசபைக் கொடியும் அரைக்கம்பத்தில் பறக்கவிடப்பட்டது.
தமிழ்த் தேசியக் கூட்டமைப்பின் சார்பில் 2001 மற்றும் 2004ஆம் ஆண்டுகளில் நாடாளுமன்ற உறுப்பினராகத் தெரிவான சிவாஜிலிங்கம், வடக்கு மாகாண சபை உறுப்பினராகவும் பணியாற்றியுள்ளார். அவரது மறைவு தமிழ் தேசிய அரசியல் வட்டாரத்திலும், வல்வெட்டித்துறை மக்களிடையேயும் பெரும் துயரத்தை ஏற்படுத்தியுள்ளது.











