ஹங்கம, வடிகல பகுதியில் உள்ள ஒரு வீட்டில் ஒரு தம்பதியினர் கொலை செய்யப்பட்ட சம்பவத்தில் வீட்டின் உரிமையாளரான பெண்ணையும் பொலிஸார் கைது செய்துள்ளனர்.
கொலைக்கு உதவியதாகவும், உடந்தையாக இருந்தார் என்ற குற்றச்சாட்டின் அடிப்படையில் இந்த கைது நடவடிக்கை இடம்பெற்றுள்ளதாக தெரிவிக்கப்பட்டுள்ளது.
தொலைபேசி பகுப்பாய்வு மற்றும் விசாரணைகளுக்குப் பின்னர், கொலையைச் செய்த முக்கிய சந்தேக நபரான ‘அந்துபெலேன் பிந்து’ என்று அழைக்கப்படும் கடவத்த ஆராச்சிகே சமன் குமாரவுடன் கைது செய்யப்பட்ட பெண்ணுக்கு நெருங்கிய தொடர்பு இருந்ததாக பொலிஸார் சந்தேகம் வெளியிட்டுள்ளனர்.
கைது செய்யப்பட்ட பெண்ணின் கணவரும் போதைப்பொருள் கடத்தல் குற்றத்திற்காகக் காவலில் வைக்கப்பட்டுள்ளார்.
இதற்கிடையில், முக்கிய சந்தேக நபர் பொலிஸாரிடம் பல விவரங்களை வெளிப்படுத்தியுள்ளார்.
தனது நண்பர் நெருங்கிய உறவில் ஈடுபட்ட பெண்ணைக் கொலை செய்ய வேண்டிய அவசியம் தனக்கு இல்லை என்று சந்தேக நபர் கூறியுள்ளார்.
சந்தேக நபர் தனது நண்பரை சுட்டுக் கொன்றதாகவும், அந்தப் பெண் பின்னால் ஒளிந்து கொண்டதாகவும், இதனால் அவர் சுடப்பட்டதாகவும் கூறினார்.
தனது போதைப் பொருள் கடத்தல் பற்றிய தகவல்களை அறிந்திருந்ததால், தனது நண்பரைக் கொன்றதாக சந்தேக நபர் கூறியதாக கூறப்படுகிறது.
இதற்கிடையில், கைது செய்யப்பட்ட சந்தேக நபர்கள் இன்று அங்குணகொலபெலஸ்ஸ நீதவான் நீதிமன்றத்தில் முன்னிலைப்படுத்தப்பட்டனர்
கொலையில் தொடர்புடைய மேலும் இரண்டு சந்தேக நபர்களைக் கைது செய்ய பொலிஸார் விசாரணை நடத்தி வருகின்றனர்.
தங்காலை குற்றப்பிரிவுக்குப் பொறுப்பான உதவி காவல் கண்காணிப்பாளர் அருணா லால் மேற்பார்வையில் இந்த சம்பவம் தொடர்பான விசாரணைகள் நடைபெற்று வருகின்றன.
