கனடாவின் இயற்கை வளங்கள் அமைச்சர் Tim Hodgson, நாட்டின் அணுசக்தி உற்பத்தித் திறனை பெருமளவில் விரிவுபடுத்தும் நோக்கில் கூட்டாட்சி அரசாங்கத்தின் புதிய அணுசக்தி மூலோபாயத்தை அறிவித்துள்ளார்.
இந்த அறிவிப்பின் போது, இங்கிலாந்தில் முன்னெடுக்கப்பட்டு வரும் மிகப்பெரிய அணுமின் நிலையத் திட்டங்களை, குறிப்பாக அரசும் தனியார் முதலீட்டாளர்களும் இணைந்து செயல்படுத்தும் மாதிரியை, கனடாவுக்கான முன்மாதிரியாக அவர் சுட்டிக்காட்டினார்.
புதிய மூலோபாயத்தின் முக்கிய இலக்கு, 2050ஆம் ஆண்டுக்குள் கனடாவின் மின்சாரத் தேவையை பூர்த்தி செய்ய அணுசக்தித் துறையை வலுப்படுத்துவதும், நாட்டின் மின்வலையமைப்பை விரிவுபடுத்துவதுமாகும். இதற்காக 10 புதிய பெரிய அளவிலான அணு உலைகளை உருவாக்கும் திட்டம் முன்வைக்கப்பட்டுள்ளது.
இதில் 2035ஆம் ஆண்டுக்குள் குறைந்தது இரண்டு புதிய அணு உலைகளின் கட்டுமானப் பணிகளைத் தொடங்கவும், 2040ஆம் ஆண்டுக்குள் மேலும் ஐந்து திட்டங்களை திட்டமிடல் அல்லது மேம்பாட்டு நிலையில் கொண்டு வரவும் அரசாங்கம் இலக்காக நிர்ணயித்துள்ளது.
இது தொடர்பில் அமைச்சர் ஹாட்ஜ்சன் கூறுகையில்,
உலகளவில் மின்சாரத் தேவை வேகமாக அதிகரித்து வருகிறது. குறிப்பாக செயற்கை நுண்ணறிவு (AI), தரவு மையங்கள், மின்சார வாகனங்கள் மற்றும் தொழில்துறை வளர்ச்சி ஆகியவற்றுக்குத் தொடர்ந்து, நம்பகமான மற்றும் குறைந்த கார்பன் வெளியீடு கொண்ட மின்சாரம் அவசியமாகிறது. இந்த தேவையை பூர்த்தி செய்வதில் அணுசக்தி முக்கிய பங்காற்றும் என்றும் அவர் வலியுறுத்தினார்.
