நாட்டின் பல பகுதிகளில் தொடர்ச்சியாக பெய்துவரும் கனமழையால் மண்சரிவு அபாயம் அதிகரித்துள்ள நிலையில், தேசிய கட்டிட ஆராய்ச்சி நிறுவனம் மற்றும் அனர்த்த முகாமைத்துவ அதிகாரிகள் மண்சரிவு அபாயப் பகுதிகளுக்கான எச்சரிக்கைகளை தொடர்ந்து புதுப்பித்து வருகின்றனர்.
இன்றைய நிலவரப்படி, கண்டி மாவட்டத்தின் பஸ்பாகே கோரளை பிரதேச செயலகப் பிரிவுக்கும், நுவரெலியா மாவட்டத்தின் அம்பகமுவ, கொத்மலை கிழக்கு, கொத்மலை மேற்கு மற்றும் நோர்வூட் பகுதிகளுக்கும் நிலை 3 சிவப்பு மண்சரிவு எச்சரிக்கை விடுக்கப்பட்டுள்ளது.
இதனிடையே, காலி உள்ளிட்ட மேலும் பல மாவட்டங்களின் சில பகுதிகளுக்கும் நிலை 2 மற்றும் நிலை 1 மண்சரிவு எச்சரிக்கைகள் அமுலில் உள்ளன.
மேலும், நாட்டின் தென்மேற்கு பகுதிகளில் தொடர்ந்தும் கனமழை பெய்யக்கூடும் என வானிலை அதிகாரிகள் எச்சரித்துள்ளனர். சில பகுதிகளில் **100 மில்லிமீற்றருக்கும் அதிகமான மழைவீழ்ச்சிபதிவாகக்கூடிய சாத்தியம் இருப்பதாகவும் தெரிவிக்கப்பட்டுள்ளது.
மண்சரிவு அபாயம் உள்ள மலைச்சரிவுகள், செங்குத்தான சரிவுகள் மற்றும் ஆபத்தான பகுதிகளில் வசிக்கும் மக்கள் மிகுந்த அவதானத்துடன் இருக்குமாறும், அதிகாரிகளால் வெளியிடப்படும் பாதுகாப்பு மற்றும் வெளியேற்ற அறிவுறுத்தல்களை உடனடியாக பின்பற்றுமாறும் கேட்டுக்கொள்ளப்பட்டுள்ளனர்.
முக்கியமாக, நிலத்தில் வெடிப்புகள் ஏற்படுதல், மரங்கள் அல்லது மின்கம்பங்கள் சாய்தல், திடீரென நீரூற்றுகள் தோன்றுதல் போன்ற மண்சரிவுக்கான அறிகுறிகள் தென்பட்டால் உடனடியாக பாதுகாப்பான இடத்திற்குச் செல்லுமாறு அறிவுறுத்தப்பட்டுள்ளது.
