போதைப்பொருள் கடத்தல் மூலம் ஈட்டப்பட்டதாகச் சந்தேகிக்கப்படும் சுமார் 85 மில்லியன் ரூபா பெறுமதியான பணம் மற்றும் சொத்துக்களை முடக்குவதற்கு இலங்கைப் பொலிஸாரின் சட்டவிரோத சொத்துக்கள் விசாரணைப் பிரிவு நடவடிக்கை எடுத்துள்ளது.
இதன்படி, யாழ்ப்பாணத்தில் அமைந்துள்ள 70 மில்லியன் ரூபாவிற்கும் அதிக பெறுமதியான இரண்டு மாடி வீடொன்றும், 15 மில்லியன் ரூபா பணமும் முடக்கப்படவுள்ளன.
கடந்த 2023ஆம் ஆண்டு ஆகஸ்ட் மாதம் 31ஆம் திகதி, யாழ்ப்பாணத்தில் விசேட அதிரடிப்படையினரால் ஐந்து சந்தேகநபர்கள் 15 மில்லியன் ரூபா பணத்துடன் கைது செய்யப்பட்ட சம்பவத்தை அடிப்படையாகக் கொண்டு இந்த விசாரணைகள் ஆரம்பிக்கப்பட்டன.
இதன்போது, லொறி ஒன்றும் கைப்பற்றப்பட்டிருந்தது.
மேலதிக விசாரணைகளில், மாதகல் பகுதியைச் சேர்ந்த 32 வயதுடைய சந்தேகநபர் ஒருவர், போதைப்பொருள் கடத்தல் மூலம் ஈட்டிய பணத்தைப் பயன்படுத்தி குறித்த இரண்டு மாடி வீட்டை நிர்மாணித்துள்ளதாகத் தெரியவந்துள்ளது.
முதற்கட்டக் கைதின்போது கைப்பற்றப்பட்ட 15 மில்லியன் ரூபா பணம், தற்போது யாழ்ப்பாணம் நீதிமன்றத்தின் காவலில் உள்ளதாகப் பொலிஸார் தெரிவித்துள்ளனர்.
இந்நிலையில், பணச்சலவை தடுப்புச் சட்டத்தின் கீழ், கடந்த ஒக்டோபர் 15ஆம் திகதி முதல் 14 நாட்களுக்கு குறித்த வீடு மற்றும் பணத்தை முடக்குவதற்கான உத்தரவு பிறப்பிக்கப்பட்டுள்ளது.
இந்தச் சம்பவம் தொடர்பான மேலதிக விசாரணைகளைப் பொலிஸார் முன்னெடுத்து வருகின்றனர்.
